Rupali Thombre On Chakankar Arrest: राज्याच्या राजकीय आणि सामाजिक वर्तुळात एकच खळबळ उडालेली आहे. रूपाली ठोंबरे पाटील यांनी राज्य महिला आयोगाच्या माजी अध्यक्षा रुपाली चाकणकर यांच्यावर खरात प्रकरणात अत्यंत गंभीर आरोप केले आहेत. ठोंबरेंनी या प्रकरणात रूपाली चाकणकरांना सहआरोपी करून तात्काळ अटक करण्याची मागणी केली आहे. एका मोठ्या रॅकेटचा पर्दाफाश करताना सामाजिक कार्यकर्त्या तृप्ती देसाई आणि पीडित महिलांनी धक्कादायक माहिती समोर आणली आहे.
मिळालेल्या माहितीनुसार, खरातने पुणे येथील काही बड्या उद्योजकांना फसवल्याचे आणि अनेक महिलांचे लैंगिक शोषण झाल्याचे प्रकरण समोर आले आहे. या प्रकरणात मुख्य आरोपीला वाचवण्यासाठी मोठी 'तोडपाणी' (आर्थिक व्यवहार) झाल्याचा दावा केला जात आहे. सर्वात धक्कादायक आरोप हा आहे की, ज्या वेळी या घटना घडल्या, त्यावेळेस रुपाली चाकणकर आयोगाच्या अध्यक्ष होत्या आणि त्यांच्या संमतीनेच महिलांना 'पत्रिका तपासणी' किंवा 'समुपदेशन' करण्याच्या नावाखाली ठराविक ठिकाणी पाठवले जात होते.
या प्रकरणातील पीडित महिलांनी असा दावा केला आहे की, त्यांचे अश्लील व्हिडीओ बनवून त्यांना ब्लॅकमेल केले जात आहे. "रोज एका नवीन महिलेचा व्हिडीओ बाहेर येत आहे. जर सुरुवातीलाच यावर कारवाई झाली असती, तर आज १५० पेक्षा जास्त महिलांचे शोषण झाले नसते," असे ठोंबरे यांनी म्हटले आहे. या व्हिडीओ क्लिप्स आधी पोलिसांकडे जाण्याऐवजी दाबण्याचा प्रयत्न झाला आणि खरात नावाच्या व्यक्तीवर गुन्हा दाखल होऊ नये म्हणून चाकणकर यांनी मध्यस्थी केल्याचा आरोपही करण्यात आला आहे.
या प्रकरणात आता DNA टेस्टचे सत्र सुरू झाल्याने अनेक महिलांच्या कौटुंबिक जीवनात वादळ निर्माण झाले आहे. "माझ्याकडे अनेक महिला येत आहेत, त्यांना मी रीतसर तक्रार करायला सांगितली आहे. मात्र, महिलांची मानसिक तयारी झाल्याशिवाय मी त्यांना फोर्स करणे योग्य नाही," असेही रूपाली ठोंबरे यांनी स्पष्ट केले.
या संपूर्ण प्रकरणात रुपाली चाकणकर किंवा त्यांच्या कुटुंबातील सदस्यांचे धागेदोरे आहेत का? याची सखोल चौकशी करून त्यांचेही व्हिडीओ समोर आणावेत, अशी मागणी विरोधकांकडून आणि पीडितांकडून केली जात आहे. या आरोपामुळे आता राज्य महिला आयोगाची प्रतिमा डागाळली असून, पोलीस प्रशासन यावर काय पाऊल उचलते, याकडे सर्वांचे लक्ष लागले आहे.
