वाल्हे: पुरंदर तालुक्यात पावसाने ओढ दिली असली, तरी जुलैअखेरीस पिंगोरी आणि कवडेवाडी खोऱ्यात झालेल्या संततधार पावसाने दिलासा दिला आहे. पिंगोरी येथील ‘जय गणेश जलाशया’त सध्या १८.५२ दशलक्ष घनफूट म्हणजेच ९४ टक्के पाणीसाठा शिल्लक आहे.
मात्र, संभाव्य पाणीटंचाईच्या पार्श्वभूमीवर हा साठा पिण्यासाठी राखून ठेवण्यात येणार असून, शेतीसाठी पाणी उपसू नये, असे आवाहन गराडे पाटबंधारे शाखेचे शाखाधिकारी अविनाश जगताप यांनी केले आहे.
मागील वर्षी मे महिन्यात मोठ्या प्रमाणावर मान्सूनपूर्व पाऊस झाल्याने जून महिन्यातच जय गणेश जलाशय ओसंडून वाहू लागला होता. त्यामुळे यंदाच्या पावसाळ्यापर्यंतही जलाशयातील पाणीसाठा टिकून राहिला. दुष्काळी परिस्थितीत श्रीमंत दगडूशेठ हलवाई गणपती ट्रस्ट, गावातील रहिवासी बाबा शिंदे आणि रोटरी क्लब यांच्या प्रयत्नांतून तसेच सामाजिक संस्थांनी
पुरविलेल्या यंत्रसामग्रीच्या मदतीने ग्रामस्थांनी श्रमदानातून जलाशयातील गाळ काढला होता. त्यामुळे 'जय गणेश जलाशय' पुनर्जीवित झाला. परिणामी, परिसरातील हजारो एकर जमीन ओलिताखाली आली असून, यंदा पाणीटंचाई जाणवणार नसल्याचे सध्याचे चित्र आहे.
शेतीसाठी पाणी उपसू नका
सर्व धरणांतील पाणीसाठा ३१ ऑगस्ट २०२७ पर्यंत पिण्यासाठी आरक्षित ठेवण्याचे शासनाचे नियोजन आहे. त्यामुळे जलाशयातील पाण्याचा वापर शेतीसाठी करू नये. हा पाणीसाठा पिण्याच्या पाण्यासाठी राखीव ठेवण्यात आला आहे. शेतकरीवर्गाने सहकार्य करावे आणि जलाशयातून चोरून पाणी उचलू नये, असे आवाहन जगताप यांनी केले.
