Pune Ganeshotsav Traffic Restrictions 2026: गणेशोत्सवाच्या पार्श्वभूमीवर पुणे शहरातील वाहतूक व्यवस्था सुरळीत ठेवण्यासाठी वाहतूक पोलिसांनी महत्त्वाचा निर्णय घेतला आहे. गणेशोत्सवाच्या काळात मध्यवर्ती पुण्यात होणारी गर्दी लक्षात घेऊन काही प्रमुख रस्त्यांवर जड आणि अवजड वाहनांच्या वाहतुकीवर 24 तास बंदी घालण्यात आली आहे. हे निर्बंध 12 सप्टेंबर ते 26 सप्टेंबर या कालावधीत लागू असणार आहेत.
गणेशोत्सवात पुण्याच्या मध्यवर्ती भागात गणेश मंडळांचे देखावे पाहण्यासाठी मोठ्या संख्येने नागरिकांची गर्दी होते. त्याचबरोबर बाजारपेठांमध्ये खरेदीसाठीही नागरिकांची मोठी वर्दळ असते. त्यामुळे या काळात वाहतूक कोंडी तसेच सुरक्षेचा प्रश्न निर्माण होऊ नये, यासाठी वाहतूक विभागाकडून हे निर्बंध लागू करण्यात आले आहेत.
जड वाहनांची वाहतूक नियंत्रित केल्यामुळे गर्दीच्या भागात वाहतूक व्यवस्थापन करणे पोलिसांना अधिक सोपे होणार आहे. तसेच नागरिकांना गणेशोत्सवाचा आनंद घेताना वाहतुकीचा अडथळा होऊ नये, हा या निर्णयामागचा प्रमुख उद्देश आहे.
गणेशोत्सव कालावधीत खालील मार्गांवर जड व अवजड वाहनांना प्रवेश करता येणार नाही:
शास्त्री रोड — सेनादत्त चौकी चौक ते अलका टॉकीज चौक
टिळक रोड — जेधे चौक (स्वारगेट) ते अलका टॉकीज चौक
कुमठेकर रोड — शनिपार ते अलका टॉकीज चौक
लक्ष्मी रोड — संत कबीर चौक ते अलका टॉकीज चौक
केळकर रोड — फुटका बुरुज ते अलका टॉकीज चौक
बाजीराव रोड — पुरम चौक ते गाडगीळ पुतळा
शिवाजी रोड — गाडगीळ पुतळा ते जेधे चौक
कर्वे रोड — नळस्टॉप चौक ते खंडोजीबाबा चौक
फर्ग्युसन कॉलेज रोड (FC रोड) — खंडोजीबाबा चौक ते वीर चाफेकर चौक
जंगली महाराज रोड (JM रोड) — स. गो. बर्वे चौक ते खंडोजीबाबा चौक
सिंहगड रोड — राजाराम ब्रिज ते सावरकर चौक
गणेश रोड / मुदलियार रोड — पॉवर हाऊस, दारूवाला पूल, जिजामाता चौक ते फुटका बुरुज चौक
गणेशोत्सवाच्या काळात पुण्याच्या मध्यवर्ती भागात नागरिकांची मोठी गर्दी होण्याची शक्यता आहे. त्यामुळे जड वाहनांच्या चालकांनी निर्बंध असलेल्या मार्गांवर जाणे टाळून उपलब्ध पर्यायी मार्गांचा वापर करावा, असे आवाहन वाहतूक पोलिसांनी केले आहे.
वाहतूक नियमांचे पालन केल्यास उत्सवाच्या काळात वाहतूक कोंडी कमी करण्यास मदत होईल. तसेच नागरिकांची सुरक्षितता आणि शहरातील कायदा-सुव्यवस्था राखण्यासाठी वाहनचालकांनी पोलिसांना सहकार्य करावे, असे आवाहन प्रशासनाकडून करण्यात आले आहे.
दरम्यान, गणेशोत्सव काळात वाहतूक व्यवस्थेत आणखी काही बदल होण्याची शक्यता असून, नागरिकांनी प्रवास करण्यापूर्वी वाहतूक पोलिसांकडून जारी करण्यात येणाऱ्या सूचनांकडे लक्ष देणे महत्त्वाचे आहे.
