पुणे: शहरातील नो-पार्किंगमधील वाहनांवर पुन्हा सुरू झालेल्या टोइंग कारवाईत पुणे पोलिस आयुक्त अमितेश कुमार यांनी घालून दिलेल्या कार्यपद्धतीचे पालन होत नसल्याचे प्रकार समोर आले आहेत. वाहन उचलण्यापूर्वी दोनवेळा उद्घोषणा करणे, वाहनचालक जागेवर असल्यास वाहन न उचलता दंडाची कारवाई करणे, प्रत्येक कारवाईचे बॉडीकॅमद्वारे चित्रीकरण करणे आणि टोइंग वाहनावर वाहतूक शाखेचा जबाबदार अधिकारी उपस्थित ठेवणे, असे स्पष्ट आदेश असतानाही अनेक ठिकाणी या नियमांकडे दुर्लक्ष होत असल्याच्या तक्रारी वाढल्या आहेत.
राज्य सरकारने टोइंगचा ठेका पुढील तीन महिन्यांसाठी वाढवल्यानंतर जवळपास महिनाभर बंद असलेली कारवाई पुन्हा सुरू झाली. मात्र, सुरुवातीपासूनच वाहनचालकांकडून मनमानी कारवाईचे आरोप होत आहेत.
वाहनमालक घटनास्थळी उपस्थित असतानाही वाहने उचलली जात असल्याचे तसेच वाहन उचलण्यापूर्वी कोणतीही उद्घोषणा केली जात नसल्याने वाहन टोइंग झाल्यानंतरच माहिती मिळत असल्याचे नागरिकांचे म्हणणे आहे. यापूर्वी टोइंग कारवाईवरून नागरिक आणि कर्मचाऱ्यांमध्ये वारंवार वाद निर्माण झाल्यानंतर वाहतूक शाखेने सविस्तर मानक कार्यपद्धती लागू केली होती.
माहिती अधिकारातून उघड झालेल्या त्रुटींनंतर खासगी कर्मचाऱ्यांचा हस्तक्षेप कमी करून पारदर्शकता वाढविण्याचा उद्देश होता. मात्र, नव्याने सुरू झालेल्या कारवाईत अनेक टोइंग वाहनांवर वाहतूक पोलिस कर्मचारीच अनुपस्थित असल्याचे दिसत असून, खासगी कर्मचाऱ्यां कडूनच संपूर्ण कारवाई केली जात असल्याचे चित्र आहे.
कारवाईदरम्यान बॉडीकॅम, व्हिडीओ रेकॉर्डिंग आणि छायाचित्रण होत नसल्याच्या तक्रारीही समोर आल्या आहेत. त्यामुळे कारवाईवर वाद निर्माण झाल्यास पुरावे उपलब्ध राहत नसल्याची खंत वाहनचालक व्यक्त करीत आहेत.
