राजगुरूनगर: मौजमजा करण्यासाठी सराईत पद्धतीने मोटारसायकली चोरून नेणाऱ्या तरुण टोळीचा पर्दाफाश करण्यात खेड पोलिसांच्या गुन्हे अन्वेषण (डीबी) पथकाला मोठे यश मिळाले आहे. उपविभागीय पोलीस अधिकारी अमोल मांडवे यांनी बुधवारी (दि २९) पत्रकार परिषदेत ही माहिती दिली. पोलिस निरीक्षक सुभाष चव्हाण यावेळी उपस्थित होते.
पोलिसांनी दोन आरोपींना अटक करून त्यांच्याकडून सुमारे १७ चोरीच्या मोटारसायकली जप्त केल्या असून १४ चोरीचे गुन्हे उघडकीस आणले आहेत. ही कारवाई खेड, शिक्रापूर ( ता शिरूर), पारगाव, मंचर, महाळुंगे उत्तर (ता. आंबेगाव) आणि वडूज (ता. जुन्नर) या पोलीस ठाण्यांच्या हद्दीतील गुन्ह्यांचा समावेश आहे.
याबाबत उपविभागीय पोलीस अधिकारी अमोल मांडवे यांनी सांगितले की, ८ जून २०२४ रोजी निमगाव खंडोबा (ता. खेड) येथे बैलगाडा शर्यतीदरम्यान उभी असलेली स्प्लेंडर मोटारसायकल (एमएच १२ टीई ९४६८) चोरट्याने नेली होती. याची तक्रार खेड पोलीस ठाण्यात दाखल झाली. बारामती येथे वाहतूक शाखेचे पोलीस अंमलदार दत्तात्रय भोसले आणि आकाश कांबळे यांनी तपास सुरू असताना संशयास्पद बाईकची ई-चलन प्रणालीद्वारे पडताळणी केली. बाईक चोरीची असल्याचे लक्षात येताच त्यांनी तत्काळ खेड पोलिसांना कळविले.
यानंतर खेडचे पोलीस निरीक्षक सुभाष चव्हाण यांच्या मार्गदर्शनाखाली गुन्हे अन्वेषण पथकाने सापळा रचला. त्यानुसार रोहित आप्पासाहेब कानगुडे (वय २२, रा. नांदगाव, ता. कर्जत, जि. अहिल्यानगर) आणि चंद्रशेखर अनिल पवार (वय २२, रा. नांदगाव, ता. कर्जत, जि. अहिल्यानगर) या दोघांना अटक करण्यात आली. पोलीस कोठडीत कसून चौकशी केल्यावर आरोपींनी विविध ठिकाणांहून मोटारसायकली चोरल्याची कबुली दिली. त्यांच्याकडून एकूण १७ दुचाकी जप्त केल्या आणि १४ गुन्हे उघडकीस आणले.
ही संपूर्ण कारवाई उपविभागीय पोलीस अधिकारी अमोल मांडवे यांच्या मार्गदर्शनाखाली पोलीस निरीक्षक सुभाष चव्हाण यांच्या नेतृत्वात सहायक पोलीस निरीक्षक अभिजीत कुदळे, पोलीस उपनिरीक्षक श्रीकांत गोडगे, महेश गरड, पोलीस हवालदार बापूसाहेब बिडकर, महेश गोसावी, सूरज राक्षे, गोकुळ कोळी, संकेत कवडे तसेच गुन्हे अन्वेषण पथकातील इतर अधिकारी-अंमलदारांनी यशस्वीरीत्या पार पाडली.
