पुणे: पुणे कॅन्टोन्मेंट हद्दीतील कॅन्टोन्मेंट कार्यालय ते भैरोबा नालादरम्यानच्या पुणे-सोलापूर रस्त्याच्या पुनर्बांधणीसह शिवरकर मुख्य रस्त्याच्या विकास प्रकल्पाला गती मिळाली आहे. या प्रकल्पासाठी प्रकल्प व्यवस्थापन सल्लागार (पीएमसी) नियुक्त करण्याच्या प्रस्तावास स्थायी समितीने मंजुरी दिल्याची माहिती समितीचे अध्यक्ष श्रीनाथ भिमाले यांनी दिली.
गुणवत्ता आणि खर्च आधारित निवड प्रक्रियेनंतर मे. स्ट्रक्टसोर्स इंजिनीअरिंग सोल्यूशन्स या संस्थेची सल्लागार म्हणून निवड केली आहे. या अंतर्गत पुणे-सोलापूर रस्त्याचे पुनःडांबरीकरण, पावसाळी जलवाहिन्या व रस्त्याचे आधुनिकीकरण, शिवरकर मुख्य रस्त्याचा सर्वांगीण विकास करण्यात येणार आहे.
प्री-टेंडर आणि पोस्ट-टेंडर प्रक्रिया तसेच प्रत्यक्ष कामांवर तांत्रिक देखरेख ठेवण्यासाठी तज्ज्ञ सल्लागार नेमण्याची प्रक्रिया पथ विभागाने राबवली. या प्रकल्पासाठी आमदार सुनील कांबळे यांनी सातत्याने पाठपुरावा केल्याचे भिमाले यांनी सांगितले.
अतिरिक्त महापालिका आयुक्त (विशेष) ओमप्रकाश दिवटे यांनी सादर केलेल्या प्रस्तावानुसार स्ट्रक्टसोर्स संस्थेचे पीएमसी म्हणून नियुक्ती व त्यांच्या दरानुसार करार करण्यास मंजुरी देण्यात आली.
निविदा प्रक्रियेत घेतला होता, दहा संस्थांनी सहभाग
निविदा प्रक्रियेत एकूण दहा संस्थांनी सहभाग घेतला होता. तांत्रिक छाननीनंतर तीन संस्था पात्र ठरल्या. त्यानंतर गुणवत्ता आणि खर्च आधारित निवड पद्धतीनुसार गुणांकन करण्यात आले. महापालिकेच्या २०२६-२७ च्या अर्थसंकल्पात गुणवत्ता तपासणी व तज्ज्ञ सल्लागार शुल्कासाठी संबंधित बजेट कोडवर तीन कोटी रुपयांची तरतूद केली असून, त्यातून या सल्लागाराची फी अदा केली जाणार आहे.
