वडगाव मावळ, पुढारी वृत्तसेवा : नवलाख उंबरे येथील स्वयंभू स्थान असलेल्या पुरातन श्रीराम मंदिरामध्ये आज (दि.१०) विविध धार्मिक कार्यक्रमांनी श्रीरामनवमी मोठ्या उत्साहात साजरी करण्यात आली.
मावळ तालुक्यातील नवलाख उंबरे गावच्या हद्दीत सुधा-बुधा नदीच्या संगमावरील पाण्याच्या डोहामध्ये इ.स.१२०० मध्ये शिवजीबुवा गुरव यांना श्रीराम, लक्ष्मण व सीतामाई अशी स्वयंभू मूर्ती सापडली होती. दरम्यान, त्याठिकाणी मूर्ती असल्याचा साक्षात्कार शिवजीबुवांना झाला होता. त्यानुसार त्यांनी ही मूर्ती पाण्यातून काढली व पाषाणावर आणून ठेवली. त्यानंतर इ.स.१२३८ मध्ये याठिकाणी मंदिराचे बांधकाम करण्यात आले असून, त्याठिकाणी शिवजीबुवांची समाधीही आहे अशी येथील अख्यायिका आहे.
स्वयंभू मूर्ती असलेल्या या स्थानाला अनन्यसाधारण महत्त्व असून याठिकाणी असंख्य भाविक दर्शनासाठी येत असतात. आज श्रीरामनवमी निमित्त मंदिराला आकर्षक विद्युतरोषणाई करण्यात आली होती. मंदिरामध्ये फुलांची आकर्षक सजावट करण्यात आली होती. शेकडो भाविकांच्या उपस्थितीत जन्मोत्सव सोहळा पार पडला.
प्रभू श्रीरामाच्या मूर्तींचा शोध लावलेल्या शिवजीबुवांची बारावी पिढी सध्या या पुरातन मंदिरामध्ये पुजारी म्हणून कार्यरत असून तेव्हापासून चालत आलेल्या प्रथा परंपरेप्रमाणे पूजा व सर्व धार्मिक विधी याठिकाणी पार पडतात, अशी माहिती पुजारी अनिल गुरव यांनी दिली.
हेही वाचलंत का ?
