पुणे: आखाडातील शेवटच्या रविवारी एकादशी आल्याने घरगुती ग्राहकांनी मांसाहाराकडे पाठ फिरविल्याचे चित्र बाजारात दिसून आले. परिणामी, मासळी, मटण आणि चिकनची मागणी तुलनेने कमी राहिली. हॉटेल व्यावसायिकांकडून मात्र खरेदी सुरू होती. देशाच्या पूर्व किनारपट्टीवरून मोठ्या प्रमाणात, तर पश्चिम किनारपट्टीवरून तुरळक मासळी बाजारात दाखल होत आहे. त्यातुलनेत मागणी जास्त असल्याने मासळीचे तेजीतील दर टिकून असल्याचे सांगण्यात आले.
बाजारात होत असलेल्या मागणीपेक्षा पक्ष्यांचा पुरवठा मुबलक असल्याने चिकनच्या भावात किलोमागे दहा रुपये, तर इंग्लिश अंडीच्या भावात शेकड्यामागे वीस रुपयांनी घट झाली आहे. मागणी आणि पुरवठ्यात समतोल असल्याने मटण आणि गावरान अंड्यांचे भाव स्थिर आहेत. येत्या बुधवारी आषाढ अमावस्या असल्याने मंगळवार आणि बुधवारी मासळी, मटण आणि चिकनला मोठी मागणी राहण्याची शक्यता व्यापाऱ्यांनी व्यक्त केली आहे. गणेश पेठ येथील घाऊक बाजारात रविवारी (दि. ९) खोल समुद्रातील मासळी १० ते १२ टन, खाडीच्या मासळीची सुमारे २०० ते ३०० किलो आणि नदीच्या मासळीची ४०० ते ५०० किलो इतकी आवक झाली. आंध्र प्रदेश येथून रहू, कतला आणि सिलनची मिळून सुमारे १५ ते २० टन इतकी आवक झाली.
खोल समुद्रातील मासळी (प्रतिकिलोचे दर):
पापलेट : कापरी : २०००-२२००, मोठे : १८००-१९००, मध्यम : १४००-१६००, लहान : १२००-१४००, भिला : ९००-१०००, हलवा : १०००-११००, सुरमई १२००-१४००, रावस : १०००-१२००, घोळ : १०००-१२००, करली : ४००-५००, पाला : १०००-१२००, वाम : पिवळी ११००-१३००, काळी : ४००-५००, ओले बोंबील : ४००-५५०.
कोळंबी : लहान : ३२०-३६०, मध्यम : ३६०-४८०, मोठी : ५५०-७५०, जम्बो प्रॉन्स : १४००-१५००, किंग प्रॉन्स : ९००-१०००, लॉबस्टर : १९००-२२००, मोरी : ४००-५५०, मांदेली : २५०-३००, राणीमासा : ३००-४००, खेकडे : ३००-४००, चिंबोर्या : ६००-७००. खाडीची मासळी - सौंदाळे : ३५०-४००, खापी : ३५०-४००, तांबोशी : ६००-७००, पालू : ३००-३५०, लेपा : ४००-४५०, बांगडा : ३२०-४००, शेवटे : २५०-३००, बेळुंजी : १५०-२००, तिसर्या : २५०-३००, तारली : ३००-३५०.
नदीतील मासळी : रहू : १५०-२००, कतला : १६०-२००, मरळ : ३००-४००, शिवडा : २५०, खवली : २००-२५०, आम्ळी : १२०-१६०, खेकडे : २५०-४००, चिलापी : ६०-१६०, वाम : ४००-५००. मटण : बोकडाचे ८००, बोलाईचे ८००, खिमा ८००, कलेजी ८४०. चिकन २३०, लेगपीस २९०, जिवंत कोंबडी १८०, बोनलेस ३४०. अंडी : गावरान (शेकडा) ११५० डझन १५६, प्रतिनग १३. इंग्लिश (शेकडा) ५८०, डझन ८४, प्रतिनग ७.
