पुणे : पुढारी वृत्तसेवा : मेट्रोमधून केलेली पुण्याची सफर…. विज्ञान उद्यानातील विविध खेळणी व उपकरणे यांच्या माध्यमातून अनुभवलेले विज्ञानाचे सिद्धांत…. अवकाश दर्शन… शिवसृष्टीमध्ये लेझर तंत्रज्ञानाच्या माध्यमातून अनुभवलेले छत्रपती श्रीशिवाजी महाराज यांचे दर्शन… अशा अनेक गोष्टी रविवारी (दि.31) अनुभवत बाल वैज्ञानिकांनी महाराष्ट्राची संस्कृती व पुण्याचे नयनरम्य दर्शन समजून घेतले आणि अनोख्या पद्धतीने सरत्या वर्षाला निरोप दिला. निमित्त होते, राष्ट्रीय बाल वैज्ञानिक प्रदर्शनानंतर आयोजित करण्यात आलेल्या शैक्षणिक सहलीचे.
विद्या प्राधिकरण, नवी दिल्ली, शालेय शिक्षण व क्रीडा विभाग महाराष्ट्र राज्य आणि राज्य शैक्षणिक संशोधन व प्रशिक्षण परिषदेतर्फे शिवछत्रपती क्रीडा संकुल येथे आयोजित 50 वी राष्ट्रीय बाल वैज्ञानिक प्रदर्शनी उत्साहात संपन्न झाली. त्यानंतर राष्ट्रीय बाल वैज्ञानिक प्रदर्शनीतील बाल वैज्ञानिक व देशभरातील मार्गदर्शक शिक्षक व अधिकारी यांच्यासाठी पुणे शहरातील ऐतिहासिक व आधुनिक स्थळांचे दर्शन घडाविण्यात आले. त्यावेळी बाल वैज्ञानिकांनी हा अनोखा अनुभव घेतला.
राष्ट्रीय शैक्षणिक संशोधन व प्रशिक्षण परिषद सचिव प्रत्यूष मंडल, बालभारतीचे संचालक कृष्णकुमार पाटील, विद्या प्राधिकरणाचे संचालक अमोल येडगे, सहसंचालक रमाकांत काठमोरे, उपसंचालक डॉ. कमलादेवी आवटे, डॉ. नेहा बेलसरे , डॉ. माधुरी सावरकर, डॉ. शोभा खंदारे, विज्ञान विभागाचे प्रमुख तेजस्विनी आळवेकर, रत्नप्रभा भालेराव आदी मान्यवर यानी शैक्षणिक सहलीमध्ये सहभाग घेतला.
नवी दिल्ली येथील राष्ट्रीय शैक्षणिक संशोधन व प्रशिक्षण परिषदेतील विज्ञान व गणित विषयाच्या विभागप्रमुख सुनीता फरक्या, राष्ट्रीय शैक्षणिक संशोधन व प्रशिक्षण परिषद सचिव प्रत्यूष मंडल तसेच अमोल येडगे आदींनी या वेळी विद्यार्थ्यांना प्रोत्साहन दिले. तत्पूर्वी शनिवारी सायंकाळी वैज्ञानिक प्रदर्शनामध्ये सहभागी झालेल्या विद्यार्थ्यांनी सांस्कृतिक कार्यक्रम सादर केले.
हेही वाचा
