पुणे: अनैतिक संबंधांच्या संशयातून एकाने सलूनचालक तरुणावर धारदार हत्याराने वार करून त्याचा निर्घृण खून केला. रूपेश सुरेश भांदिर्गे (वय 41, रा. स्पंदन बिल्डिंग, नऱ्हे) असे खून झालेल्या तरुणाचे नाव आहे.
याबाबत रूपेश यांचा भाऊ नीलेश सुरेश भांदिर्गे (वय 38, रा. वारजे) यांनी सिंहगड रोड पोलिस ठाण्यात फिर्याद दिली आहे. त्यानुसार पोलिसांनी युवराज गेजगे (रा. रेणुकानगरी, वडगाव बुद्रुक) याच्याविरुद्ध खुनाचा गुन्हा दाखल करून त्याला ताब्यात घेतले आहे. ही घटना वडगाव बुद्रुक येथील विकास कृष्णा दांगट यांच्या घरासमोर रविवारी (दि.17 मे) रात्री दहा वाजता घडली.
पोलिसांनी दिलेल्या माहितीनुसार, आरोपी युवराज गेजगे याला आपल्या पत्नीसोबत रूपेश याचे अनैतिक संबंध असल्याचा संशय होता. यावरून दोघांमध्ये यापूर्वी वाद झाले होते. त्यानंतर त्यांच्यामध्ये समेट होऊन त्यांनी हे प्रकरण मिटविले होते. तरीही या गोष्टीचा राग युवराज याच्या मनात होता. रूपेश हा वडगाव परिसरातील विकास दांगट यांच्या घरासमोर रविवारी रात्री 10 वाजण्याच्या सुमारास आला होता. त्यावेळी युवराजने त्याला तेथे गाठले. दोघांमध्ये वादावादी झाली.
तेव्हा युवराज याने आपल्याकडील धारदार हत्याराने रूपेश यांच्यावर एकामागून सपासप वार केले. त्याच्या मानेवर, डोक्यावर आणि चेहऱ्यावर असे तब्बल चौदा वार झाल्याने तो रक्ताच्या थारोळ्यात पडला. गंभीर दुखापत झाल्यामुळे रूपेश यांचा जागीच मृत्यू झाला.
घटनेनंतर आरोपी युवराज गेजगे घटनास्थळावरून फरार झाला होता. घटनेची माहिती मिळताच सिंहगड रोड पोलिसांनी घटनास्थळी धाव घेतली. रूपेश यांचा जागीच मृत्यू झाला होता. पोलिसांनी आरोपी युवराज याला ताब्यात घेतले आहे. पुढील तपास सहायक पोलिस निरीक्षक समीर करपे तपास करीत आहेत.
