पुणे: शिवाजीनगर येथील कामगार पुतळ्यालगत हिंजवडी-शिवाजीनगर (लाइन ३) आणि स्वारगेट-पिंपरी चिंचवड (लाइन १) या दोन प्रमुख मेट्रोमार्गिकांना जोडणाऱ्या स्कायवॉकचे काम अंतिम टप्प्यात आले आहे.
१५० मीटर लांबीचा हा स्कायवॉक ऑगस्टअखेर तयार होणार असून, केंद्रीय मेट्रो रेल्वे सुरक्षा आयुक्तांच्या (सीएमआरएस) तपासणीनंतर तो प्रवाशांसाठी खुला केला जाईल. सुमारे ५.५ कोटी रुपये खर्चून उभारण्यात आलेला हा स्कायवॉक दोन्ही स्थानकांच्या कॉनकर्स क्षेत्राला थेट जोडण्यात येत आहे.
यामुळे प्रवाशांना स्थानकाबाहेर न पडता किंवा रस्त्यावरील वाहतूक कोंडीचा सामना न करता सहजपणे मेट्रो बदलता येईल. आयटी पार्कच्या (हिंजवडी) दिशेने जाणारे कर्मचारी तसेच पिंपरी-चिंचवड व स्वारगेटच्या प्रवाशांचा यामुळे वेळ वाचणार आहे.
पुणेकरांचा प्रवास सुखकर व गतिमान करण्यासाठी महामेट्रो कटिबद्ध आहे. शिवाजीनगर येथील दोन्ही मेट्रोमार्गिकांना जोडणाऱ्या १५० मीटर लांबीच्या स्कायवॉकचे काम अंतिम टप्प्यात असून, ऑगस्टअखेरपर्यंत तो तयार होईल. ५.५ कोटी रुपये खर्चून उभारलेला हा स्कायवॉक पे-टू-पे क्षेत्राला जोडत असल्याने प्रवाशांना स्थानकातून बाहेर न पडता थेट मेट्रो बदलता येईल. तपासणी आणि लाइन ३ चे स्थानक सुरू होताच हा स्कायवॉक प्रवाशांच्या सेवेत दाखल केला जाईल.
चंद्रशेखर तांबवेकर, अतिरिक्त महाव्यवस्थापक, महामेट्रो
