पुणे: शारदीय नवरात्रोत्सवाच्या पार्श्वभूमीवर गुलटेकडी मार्केट यार्डात रताळ्यांची आवक वाढली आहे. महाराष्ट्रासह कर्नाटकातून रताळी दाखल होत असली, तरी गोड चव, आकर्षक रूप आणि लहान आकारामुळे राज्यातील गावरान रताळ्यांना ग्राहकांची अधिक पसंती मिळत आहे. विशेषतः साताऱ्यातील कराड, कोल्हापुरातील मलकापूरसह यंदा प्रथमच दाखल झालेल्या सोलापूरच्या बार्शी भागातील रताळ्यांना मागणी आहे. त्यामुळे कर्नाटकच्या तुलनेत राज्यातील रताळींना प्रतिकिलो ५ ते १५ रुपये अधिक भाव मिळत आहे.
नवरात्रोत्सवाला रविवारपासून (दि. ११) प्रारंभ होत असल्याने उपवासासाठी रताळे खरेदीला वेग आला आहे. शुक्रवारी (दि. ९) बाजारात एक हजार ते बाराशे पोत्यांची, म्हणजेच सुमारे ४० ते ६० टन आवक झाली. घाऊक बाजारात दर्जानुसार प्रतिकिलो २० ते ३५ रुपये भाव मिळत आहे. मात्र, वाढलेली आवक आणि पावसाच्या अनियमिततेमुळे गुणवत्तेवर झालेल्या परिणामाने मागील वर्षीच्या तुलनेत दर १० ते २० टक्क्यांनी घटले आहेत. कराड, मलकापूरची रताळे चवीला गोड असल्याने त्यांना अधिक मागणी असते. त्या तुलनेत कर्नाटकातील रताळी आकाराने मोठी आणि चवीला काहीशी तुरट असल्याने त्यांना कमी भाव मिळतो.
बार्शीच्या रताळ्यांनी बाजारात मारली बाजी!
यंदा प्रथमच सोलापूर जिल्ह्यातील बार्शी भागातून रताळींची आवक झाली आहे. आकर्षक रूप आणि चांगल्या दर्जामुळे या रताळींनी ग्राहकांचे लक्ष वेधले आहे. कराडच्या रताळींच्या बरोबरीने बार्शीच्या रताळ्यांनाही प्रतिकिलो ३० ते ३५ रुपये भाव मिळत आहे. त्यामुळे बाजारात नव्याने दाखल झालेल्या बार्शीच्या रताळ्यांना चांगला प्रतिसाद मिळत असल्याचे व्यापाऱ्यांनी सांगितले.
रताळ्यांचे घाऊक दर (प्रतिकिलो)
आवक क्षेत्र - किलोचे दर
मलकापूर, कोल्हापूर - ३० रुपये
कराड, सातारा - ३० ते ३५ रुपये
बेळगाव, कर्नाटक - २० ते २५ रुपये
बार्शी, सोलापूर - ३० ते ३५ रुपये
नवरात्रोत्सवामुळे मार्केट यार्डात रताळ्यांची आवक वाढली असून, उपवासाच्या पार्श्वभूमीवर मागणीही वाढत आहे. राज्यातील गावरान रताळे गोड चव आणि आकर्षक असल्याने त्यांना ग्राहकांची अधिक पसंती मिळते. यंदा प्रथमच बार्शी भागातून रताळी दाखल झाली आहेत. मात्र, काही मालाच्या दर्जावर परिणाम झाल्याने मागील वर्षीच्या तुलनेत दर कमी आहेत. उत्सवकाळात आवक नियमित राहील.
अमोल घुले, अध्यक्ष, श्री शारदा गजानन आडते असोसिएशन
