पुणे: पुणे जिल्हा सहकारी दूध उत्पादक संघाकडून (कात्रज डेअरी) दूध दरफरकापोटी शेतकऱ्यांना प्रतिलिटरला दोन रुपये देण्याचा निर्णय वार्षिक सभेत घेण्यात आला होता आणि पहिल्या टप्प्यात ऑक्टोबर 2025 मध्ये एक रुपयाप्रमाणे रक्कम दिली.
उर्वरित एक रुपयाप्रमाणे 6 कोटी 75 लाख 12 हजार रुपये हे 865 दूध संस्थांच्या शेतकऱ्यांच्या थेट बँक खात्यांत नुकतेच जमा करण्यात आल्याची माहिती संघाचे अध्यक्ष ॲड. स्वप्निल ढमढेरे यांनी दिली. म्हणजेच, दोन टप्प्यांत मिळून एकूण 13 कोटी 50 लाखांहून अधिक रक्कम देण्यात आली आहे.
दूध उत्पादक शेतकऱ्यांच्या कष्टाचा योग्य मोबदला देण्यास संघाने नेहमीच प्राधान्य दिले आहे. त्याचबरोबर भविष्यात दूधसंकलनात अत्याधुनिक तंत्रज्ञानाचा वापर, शीतसाखळी मजबूत करणे, पशुखाद्यांच्या सुविधा वाढविणे, कात्रज बँड अधिक बळकट करणे, नवीन दुग्धजन्य उत्पादनांचा बाजारात विस्तार करणे तसेच महिला व युवा शेतकऱ्यांसाठी प्रशिक्षण व स्वयंरोजगाराच्या संधी निर्माण करणे, यावर संघाचा विशेष भर राहणार आहे.
पुणे जिल्ह्यातील ग््राामीण भागातील शेतकऱ्यांचा आधारस्तंभ म्हणून संघाची ओळख अधिक मजबूत होत असून, शेतकरीहिताचे निर्णय आणि ठोस अंमलबजावणीमुळे संघ नव्या विश्वासाने पुढे जात असल्याचे त्यांनी कळविले आहे.
बाळासाहेब ढमढेरे, प्रकाश भोईटे यांना श्रद्धांजली अर्पण
कात्रज दूध संघाचे माजी ज्येष्ठ संचालक बाळासाहेब ढमढेरे आणि पुणे श्रमिक पत्रकार संघाचे माजी अध्यक्ष व ज्येष्ठ पत्रकार प्रकाश भोईटे यांचे नुकतेच निधन झाले. कात्रज संघाच्या सोमवारी (दि. 20) झालेल्या संचालक मंडळाच्या बैठकीत ढमढेरे व भोईटे यांना श्रद्धांजली अर्पण करण्यात आल्याची माहिती संघाचे व्यवस्थापकीय संचालक मनोज लिमये यांनी दिली.
