पुणे: सिंहगड रस्त्यावरील एकतानगर परिसरात पुराचे पाणी थैमान घालत असताना एका चिमुकल्या नवजात जिवाला आणि त्याच्या आईला सुरक्षित बाहेर काढताना अग्निशमन दलाच्या जवानांनी देवदूतासारखी कामगिरी बजावली.
कमरेएवढ्या साचलेल्या गढूळ पाण्यात जेव्हा मदतीची सर्व दारे बंद वाटत होती तेव्हा जवानांनी दाखवलेल्या समयसूचकतेमुळे एका नवजात बालकाला बाहेर काढण्यात यश आले. धरणातून सुटलेल्या पाण्यामुळे द्वारका, जलविहार आणि परिसरातील सोसायट्या शुक्रवारी पाण्याखाली गेल्या होत्या.
एका इमारतीमधील एका घरात अवघ्या काही दिवसांचे नवजात बाळ आणि त्याची बाळंतीण आई पुराच्या पाण्यात अडकली होती. चारी बाजूंनी वाढणाऱ्या पाण्याच्या पातळीमुळे दोघेही संकटात होते. घटनेची माहिती मिळताच अग्निशमन दलाचे जवान रबरी बोट घेऊन तातडीने तेथे पोहचले.
कमरेएवढ्या पाण्यातून मार्ग काढत जवानांनी प्रथम आईला अत्यंत काळजीपूर्वक बोटीत बसवले. त्यानंतर अवघ्या काही दिवसांच्या त्या बाळाला एका जवानाने अत्यंत मायेने आणि सुरक्षेने आपल्या दोन्ही हातात उराशी कवटाळले.
पुराच्या पाण्यात भीतीचे सावट असतानाही जवानाने त्या चिमुकल्याला लहानशा छातीशी घट्ट धरून सुखरूप बाहेर आणले. बाळाला आणि आईला सुरक्षित किनाऱ्यावर आणल्यानंतर संपूर्ण परिसरात उपस्थितांनी सुटकेचा निःश्वास सोडला. बाळाला सुरक्षित हसताना पाहून त्या देवदूत ठरलेल्या जवानाच्या डोळ्यांतही आनंदाश्रू तरळले.
