पुणे: शहरात डेंग्यू आणि चिकुनगुनियाच्या रुग्णसंख्येत वाढ होत असून, सर्वाधिक २२९ डेंग्यूचे रुग्ण कोथरूडमध्ये आढळले आहेत. त्यापाठोपाठ नगर रस्ता-वडगाव शेरी, औंध-बाणेर आणि धनकवडी या चार भागांत वाढ झाली असून, प्रतिबंधात्मक उपाययोजना राबविण्यात हलगर्जीपणा केल्याप्रकरणी पुणे महापालिकेच्या आरोग्य विभागाने चार प्रभागांतील मलेरिया अधिकाऱ्यांना कारणे दाखवा नोटिसा बजावल्या आहेत.
महापालिकेच्या आकडेवारीनुसार, १ जानेवारी ते ३० सप्टेंबर २०२६ या कालावधीत शहरात डेंग्यूचे २,३९१, तर चिकुनगुनियाचे १०६ रुग्ण नोंदविले. पावसाळ्यात डेंग्यूचा प्रादुर्भाव वाढला असून, सप्टेंबरमध्ये सर्वाधिक ९५६ रुग्ण आढळले. जूनमध्ये १६६, जुलैमध्ये ५१८ आणि ऑगस्टमध्ये ७५१ रुग्णांची नोंद झाली.
नऊ महिन्यांतील एकूण रुग्णांपैकी ४० टक्के रुग्ण एकमेव सप्टेंबरमध्ये आढळले. कोथरूड पाठोपाठ नगर रस्ता-वडगाव शेरीमध्ये २२२, औंध-बाणेरमध्ये २१२, धनकवडी- सहकारनगरमध्ये १३९ आणि येरवडा- कळस- धनोरीमध्ये १३७ डेंग्यू रुग्ण आढळले. चिकुनगुनियाचे सर्वाधिक १९ रुग्ण औंध-बाणेरमध्ये नोंदवले. त्यापैकी १२ रुग्ण एकाच गृहनिर्माण सोसायटीतील आहेत.
औंध-बाणेरमधील पाहणीत महापालिकेच्याच अतिक्रमणविरोधी विभागाच्या गोदामात साचलेल्या कचऱ्यामुळे डासांची पैदास होत असल्याचे आढळले. आरोग्य विभागाने गोदाम अधिकाऱ्यांना नोटीस बजावून परिसर स्वच्छ करण्याचे निर्देश दिले. जैविक कीटकनाशकाची फवारणी तसेच बाधित सोसायटीत फवारणी व धुरीकरण केले.
घरोघरी तपासणी करण्याचे निर्देश
प्रादुर्भावग्रस्त भागांत पाच किलोमीटरच्या परिसरात घरोघरी तपासणी, ताप सर्व्हेक्षण, डास उत्पत्तिस्थळांचा शोध आणि फवारणीसह विविध उपाय सलग १५ दिवस राबविण्याचे निर्देश देण्यात आले आहेत.
रुग्णसंख्येत वाढ का झाली, ती रोखण्यासाठी कोणती कारवाई केली आणि संबंधित भागात दररोज कोणत्या उपाययोजना केल्या जातात, याचा खुलासा चारही मलेरिया अधिकाऱ्यांकडून मागविण्यात आला. त्यांना मुख्यालयात बोलावून कारवाईचा अहवाल सादर करण्याचे निर्देश देण्यात आले आहेत.
डॉ. राजेश दिघे, सहाय्यक आरोग्य अधिकारी, महापालिका
