चाकण: राज्य शासनाने तळेगाव-चाकण-शिक्रापूर (महामार्ग 548-डी) या महामार्गाच्या कामाला अखेर मंजुरी दिली आहे. या महामार्गाच्या सुधारणा आणि विस्तारीकरणाचे सुमारे 4207 कोटी रुपये खर्चाचे हे काम माँटे कार्लो लिमिटेड कंपनीला मंजूर करण्यात आले आहे. आता ही कंपनी रस्त्याचे काम चार वर्षांच्या कालावधीत पूर्ण करणार आहे.
राज्यातील दळणवळण अधिक सुलभ होण्यासाठी महामार्गाचे जाळे विकसित करावे, असे निर्देश मुख्यमंत्री देवेंद्र फडणवीस यांनी दिले आहेत. त्यानुसार 53.2 किमीचा हा मार्ग चारपदरी उन्नत तसेच जमिनीला समांतर रस्ता म्हणून विकसित केला जाणार आहे. या महामार्गाच्या कामामुळे निश्चितच पुणे जिल्ह्यातील औद्योगिक विकासास मदत होणार आहे. या संपूर्ण परिसराची वाहतूक कोंडीतून सुटका होण्यासाठी मदत होणार आहे.
हा मार्ग लवकर होण्यासाठी राज्याचे माजी उपमुख्यमंत्री दिवंगत अजित पवार तसेच राज्याचे सार्वजनिक बांधकाममंत्री शिवेंद्रसिंहराजे भोसले यांनी व आमदार बाबाजी काळे यांच्यासह शिरूर आणि मावळच्या आमदारांनी पाठपुरावा केला होता. त्यानंतर अखेर मंत्रिमंडळाने या कामाला मंजुरी दिलेली आहे.
या रस्त्याच्या कामाबाबत मुख्यमंत्री फडणवीस यांच्या अध्यक्षतेखाली विधानभवन येथे मंत्रिमंडळ पायाभूत सुविधा समितीची बैठक पार पडली. त्यात या कामास मान्यता देण्यात आली आहे. या वेळी उपमुख्यमंत्री सुनेत्रा अजित पवार, सार्वजनिक बांधकाममंत्री शिवेंद्रसिंहराजे भोसले, मुख्य सचिव राजेश अग््रावाल, महाराष्ट्र राज्य पायाभूत सुविधा विकास महामंडळाचे व्यवस्थापकीय संचालक बिजेश दीक्षित, सार्वजनिक बांधकाम विभागाचे अपर मुख्य सचिव मिलिंद म्हैसकर यांच्यासह संबंधित विभागाचे अधिकारी उपस्थित होते.
...असा असणार रस्ता
तळेगाव ते चाकण क्रमांक 548 डी राष्ट्रीय महामार्ग 0 ते 26 किलोमीटरदरम्यान 4 पदरी उन्नत आणि 4 पदरी जमिनीस समांतर असणार आहे. तसेच, याच महामार्गावर चाकण ते शिक्रापूरदरम्यान पुढे 26 ते 43 किलोमीटर लांबीमध्ये 4 पदरी जमिनीस समांतर महामार्गाची डीएफबीओटी (डिझाइन, फायनान्स, बिल्ट, ऑपरेट अँड ट्रान्सफर) पद्धतीने सुधारणा करण्यात येणार आहे.
