पुणे: ताडीवाला रस्त्यावरील झोपडपट्टीत रविवारी (दि. 25) सकाळी एका अरुंद गल्लीत अडकलेल्या आठ महिन्यांच्या गर्भवती गायीची 10 तासांच्या अथक प्रयत्नांनंतर सुटका करण्यात आली. अग्निशमन दल आणि प्राणी बचाव पथकाच्या संयुक्त प्रयत्नांमुळे हे बचावकार्य यशस्वी झाले.
रविवारी सकाळी सहाच्या सुमारास ताडीवाला रस्त्यावरील झोपडपट्टीत एका अरुंद गल्लीत एक गाय अडकल्याची माहिती अग्निशमन दलाला मिळाली. सुरुवातीला अग्निशमन दलाच्या जवानांनी सेफ्टी बेल्ट, रस्सी आणि पुली यांसारख्या उपकरणांच्या मदतीने गायीला बाहेर काढण्याचा प्रयत्न केला. मात्र, ‘एल’ आकाराची आणि दीड ते दोन फूट अरुंद गल्ली असल्याने बचावकार्यात मोठ्या अडचणी येत होत्या. (Latest Pune News)
पुली लावून गायीचे अडकलेले पाय बाहेर काढून तिला उभे करण्याचा प्रयत्नही करण्यात आला. अग्निशमन दलाच्या मदतीसाठी वाइल्ड लाईफ रेस्क्यू टीम देखील घटनास्थळी दाखल झाली. त्यांनीही विविध उपकरणांचा वापर करीत गायीच्या सुटकेसाठी प्रयत्न केले.
अखेरीस गल्लीतील घराबाहेरील चार जिने आणि कट्टे हळुवारपणे काढून गायीला बाहेर काढण्यात यश आले. सायंकाळी चारच्या सुमारास गाय सुरक्षितपणे बाहेर आल्यानंतर परिसरातील नागरिकांनी आनंद व्यक्त केला.
वरिष्ठ अग्निशमन अधिकारी विजय भिलारे यांच्या मार्गदर्शनाखाली हे बचावकार्य पार पडले. अग्निशमन दल, वाइल्ड लाईफ रेस्क्यू टीम, पोलिस विभाग आणि स्थानिक नागरिक यांच्या सहकार्यामुळे गर्भवती गायीला सुखरूप बाहेर काढणे शक्य झाले.
