पिंपरी: पिंपरी-चिंचवड शहर परिसराला पावसाने रविवार (दि. २८) चांगलेच झोडपले. दुपारी तीन नंतर आलेल्या पावसाने थोड्याच वेळात परिसरातील अनेक रस्त्यांवर पाणीच पाणी केले. मोठ्या प्रमाणात साचलेल्या पाण्यामुळे महापूरसदृशिस्थिती निर्माण झाली होती. पहिल्याच दमदार पावसामुुुळे शहराचा बोजवारा उडाला असून प्रशासकीय दाव्यांचे वाभाडे निघाले आहेत. शहरात कुठेही पाणी साचू नये म्हणून पालिकेकडून पावसाळापूर्व केमी असल्याचे सांगितले जात आहे; परंतु अनेक ठिकाणी पाणी साचल्याने पालिकेचा दावा फोल ठरत आहे.
चिखली, मोशी, भोसरी, चऱ्होली, वाल्हेकरवाडी याठिकाणी जोरदार पाऊस झाला. मावळ परिसरातही रविवारी दुपारपासून दमदार पावसाला सुरुवात झाली. रविवारी सकाळपासूनच वातावरण ढगाळ झाले होते. हवेत उष्माही जाणवत होता. दुपारी तीननंतर रिमझिम पावसाला सुरुवात झाली. त्यानंतर आलेल्या जोराच्या पावसामुळे नागरिकांची तारांबळ उडाली.
थोड्याच कालावधीत दमदार पावसाने अनेक ठिकाणी रस्त्यावर गुडघाभर पाणी साचले. यातून वाहनचालकांना गाडी काढताना कसरत करावी लागत असल्याचे चित्र होते. देहू-आळंदी रस्त्यावर मोठ्या प्रमाणात पाणी साचले होते. काही ठिकाणी साचलेल्या पाण्यातून मार्ग काढत जाणाऱ्या दुचाकीस्वारांचे हाल झाले. साचलेल्या पाण्यातून जाणाऱ्या पादचाऱ्यांना खड्ड्यांचा अंदाज येत नसल्याने जीव मुठीत घेवून जावे लागले.
दमदार पावसामुळे नागरिकांची तारांबळ उडाली. रविवार असल्याने खरेदीसाठी बाहेर पडणार्या नागरिकांना पावसाने झोडपले. आडोसा शोधेपर्यंत नागिरक पावसाने आलेचिंब झाले होते. पावसामुळे नागरिकांना पाऊस थांबेपर्यंत आडोशाला उभारावे लागले. मोशी, आळंदी , स्पाइन रस्त्यावरही मोठ्या प्रमाणात पाणी साचले होते. साचलेल्या पाण्यातून मार्ग काढताना वाहनचालकांना कसरत करावी लागत असल्याचे दिसून आले.
पावसाचा जोर जास्त असल्याने दृश्यमानता कमी झाली होती. उद्योगनगरीतील काही भागातील रस्ते पाण्याने तुंबले होते. रस्त्यावरील पाण्याचा निचरा होत नसल्याने अनेक ठिकाणी वाहने बंद पडल्याचे दृश्य होते. पहिल्याच दमदार पावसाने पूरसदृशस्थिती निर्माण केल्याने पालिका प्रशासनाची पावसाळापूर्व कामांची पोलखोल केल्याचे दिसून येत आहे.
