ओतूर: रस्त्यावरून पादचाऱ्यांच्या जीवितास धोका निर्माण होईल अशा बेदरकार पद्धतीने पिकअप वाहन चालवत, वाहनात "नागीण डान्स"सदृश वेडीवाकडी कसरत करणाऱ्या चालकाविरुद्ध ओतूर पोलिसांनी गुन्हा दाखल केला आहे. या कारवाईमुळे वाहतूक नियमांचे उल्लंघन करणाऱ्या बेफाम चालकांना चांगलीच चपराक बसली आहे.
ओतूर पोलीस ठाण्याचे पोलीस अंमलदार शाम जायभाये व पोलीस हवालदार नामदेव बांबळे हे नियमित पेट्रोलिंग करत असताना डिंगोरे येथील आमले शिवार वस्तीच्या दिशेने जाणाऱ्या पुष्पावती नदीवरील पुलाजवळ ही घटना निदर्शनास आली.
यावेळी पिकअप गाडी चालक सौरभ संतोष भिसे (रा. डिंगोरे, ता. जुन्नर) हा भरधाव वेगाने व रस्त्याच्या परिस्थितीकडे पूर्णपणे दुर्लक्ष करून वाहन (एमएच १४ एलबी ७४३५) चालवत होता. पादचाऱ्यांच्या जीवितास धोका निर्माण होईल अशा पद्धतीने वाहनाला वेडीवाकडी वळणे देत "नागीण डान्स"सारखी धोकादायक कसरत करत असल्याचे पोलिसांच्या निदर्शनास आले.
पोलिसांनी तत्काळ वाहन अडवून चालकाविरुद्ध ओतूर पोलीस ठाणे येथे गुन्हा दाखल केला आहे. या प्रकरणी पुढील कायदेशीर कारवाई सुरू असल्याची माहिती सहाय्यक पोलीस निरीक्षक ज्ञानेश्वर बाजगिरे यांनी दिली.
बेपर्वाईने वाहन चालवून स्वतःच्या आणि इतरांच्या जीवाशी खेळणाऱ्या वाहनचालकांवर ओतूर पोलिसांकडून यापुढेही कठोर कारवाई केली जाणार असल्याचा इशाराही यावेळी देण्यात आला.
