ओतूर: जुन्नर तालुक्यातील ओतूर परिसरात पुन्हा एकदा बिबट्याच्या हल्ल्याची धक्कादायक घटना घडली आहे. ओतूर हद्दीतील जुन्या मांदारने रोडवरील वाकचौरे मळा येथे गुरुवारी (दि. २१) सकाळी सुमारे ६ वाजण्याच्या सुमारास बिबट्याने पाचवीत शिकणाऱ्या १० वर्षांच्या मुलीवर अचानक हल्ला केला. या हल्ल्यात काव्या महेंद्र वाकचौरे (रा. वाकचौरे मळा, ओतूर) ही गंभीर जखमी झाली आहे.
मिळालेल्या माहितीनुसार, पहाटे ६ वाजण्याच्या वेळेस काव्या घराजवळ असताना दबा धरून बसलेल्या बिबट्याने अचानक तिच्यावर झडप घातली. मुलीच्या आरडाओरडीनंतर परिसरातील नागरिकांनी आरडाओरड करीत घटनास्थळी धाव घेतल्याने बिबट्याने जंगलाच्या दिशेने पळ काढला. या हल्ल्यात काव्याच्या शरीरावर गंभीर जखमा झाल्या असून तिला तातडीने ओतूर येथील प्राथमिक आरोग्य केंद्रात उपचारासाठी दाखल करण्यात आले आहे.
घटनेची माहिती सामाजिक कार्यकर्ते अशोक सखाराम अहिनवे तसेच मुलीच्या पालकांनी वनविभागाला दिली असून वनाधिकारी घटनास्थळी दाखल झाले आहेत. परिसरात बिबट्याची दहशत निर्माण झाली असून नागरिकांमध्ये भीतीचे वातावरण पसरले आहे.
दरम्यान, वाकचौरे मळा परिसरात वारंवार बिबट्यांचा वावर वाढत असल्याचा आरोप ग्रामस्थांनी केला आहे. वनविभागाने तातडीने पिंजरा लावून बिबट्याचा बंदोबस्त करावा तसेच नागरिकांच्या सुरक्षेसाठी कायमस्वरूपी उपाययोजना कराव्यात, अशी मागणी संतप्त ग्रामस्थांकडून करण्यात येत आहे.
ओतूरचे ग्रामीण रुग्णालय बंदच; उपचारासाठी काव्याची हेळसांड
या हल्ल्यात काव्याच्या शरीरावर गंभीर जखमा झाल्या असून तिला तातडीने ओतूर येथील प्राथमिक आरोग्य केंद्रात उपचारासाठी दाखल करण्यात आले. मात्र, ओतूर येथील १४ कोटी रुपये खर्चून उभारण्यात आलेले ग्रामीण रुग्णालय अद्यापही सुरू न झाल्याने जखमी मुलीच्या उपचारासाठी मोठी हेळसांड झाल्याचा आरोप नागरिकांनी केला आहे. डॉक्टर व कर्मचाऱ्यांची नियुक्ती नसल्याने संतप्त ग्रामस्थांनी प्रशासनाविरोधात तीव्र नाराजी व्यक्त केली आहे.
