पुणे: नीट परिक्षेच्या निकालानंतर एका विद्यार्थिनीने राहत्या घरी गळफास घेऊन आत्महत्या केल्याचा प्रकार समोर आला आहे. अनुष्का चौगुले (वय. १८, रा. सॅप्रॉन हिल सोसायटी महंमदवाडी, हडपसर) असे आत्महत्या करणाऱ्या विद्यार्थिनीचे नाव आहे. ही घटना शुक्रवारी (दि. १७) सकाळी साडेनऊ वाजेच्या सुमारास उघडकीस आली आहे.
याप्रकरणी, काळेपडळ पोलिस ठाण्यात अकस्मात मृत्यूची नोंद करण्यात आली आहे. याबाबत बोलताना वरिष्ठ पोलिस निरीक्षक गिरीषा निंबाळकर यांनी सांगितले, अनुष्का हीने नीटची परिक्षा दिली होती. त्या परिक्षेचा निकाल काल लागला होता.
वडील खासगी नोकरी करतात तर आई गृहीणी आहे. अनुष्काला एक लहान भाऊ आहे. सकाळी वडील नेहमीप्रमाणे कामावर गेले होते. तर भाऊ शाळेत गेला होता. आई आणि ती असे दोघे घरी होते. काल नीटच्या निकालाचे संकेतस्थळ डाऊन होते. त्यामुळे तिने आज सकाळी निकाल पाहिला असावा.
अनुष्का त्यानंतर तिच्या खोलीत गेली होती. उशिरापर्यंत आवाज देऊन देखील ती दरवाजा उघडत नाही हे लक्षात आल्यानंतर तिच्या आईने दुसऱ्या चावीच्या साह्याने खोलीचा दरवाजा उघडला. त्यावेळी अनुष्का हिने पंख्याला गळफास घेतल्याचे दिसून आले.
दरम्यान, घटनेची माहिती मिळताच काळेपडळ पोलिसांनी घटनास्थळी धाव घेतली. त्यांनी खोलीत पाहिले असता, सुसाईड नोट मिळून आली नाही. तसेच ती मोबाईल वापरत नव्हती. त्यामुळे अनुष्का हिने आत्महत्या कोणत्या कारणातून केली हे मात्र समजू शकलेले नाही. पुढील तपास काळेपडळ पोलिस करत आहेत.
