पुणे: पुणे आणि पिंपरी चिंचवड महापालिकेत राष्ट्रवादी काँग्रेस शरदचंद्र पवार पक्ष आणि राष्ट्रवादी काँग्रेस अजित पवार पक्ष हे दोन्ही पक्ष एकत्र निवडणूक लढणार असल्याची माहिती राष्ट्रवादी काँगेस (शरद पवार पक्ष) आमदार रोहित पवार यांनी मांजरी येथील वसंतदादा शुगर इन्स्टिट्यूट येथे पत्रकारांशी बोलताना दिली. उद्या दुपारपर्यंत जागावाटप नक्की होईल. जागावाटप ठरलेले आहे. परंतु ते लगेच सांगणार नसल्याचे ते म्हणाले.
बलाढ्य शक्तीविरोधात लढायचे असेल तर एकत्रच निवडणूक लढवावी लागेल. म्हणून दोन्ही पक्षाच्या कार्यकर्त्यांसाठी हा निर्णय स्थानिक पातळीवर झाला आहे. आम्ही कुठेही घड्याळाच्या चिन्हावर लढणार नाही. तुतारी आणि घड्याळ हे दोन्ही चिन्ह स्वतंत्र चिन्हावर निवडणूक लढवतील. आमच्या पक्षाचे माजी शहराध्यक्ष प्रशांत जगताप हे चांगले पदाधिकारी होते. पण त्यांनी का आणि कशामुळे निर्णय घेतला, याची वेगळी आणि मोठी कारणे आहेत.
प्रशांत जगताप यांच्याबरोबरचे कार्यकर्ते होते, त्यातील 95 टक्के कार्यकर्त्यांचे मत हे आपल्याला घड्याळाबरोबरच जावे लागेल या विचाराचे होते. अजित पवार गट आणि शरद पवार गटाचे कार्यकर्ते एकत्र आले. त्यांचाच हा निर्णय आहे. महानगरपालिकेचा विषय आहे. विलीनीकरणाचा विषय असता तर संपूर्ण महाराष्ट्रात युती केली असती. पण तसं काही झालेलं नसल्याचेही पवार यांनी स्पष्ट केले.
दोन्ही राष्ट्रवादी पक्षाच्या पुणे आणि पिंपरी चिंचवडमधील कार्यकर्त्यांनी घेतलेला हा निर्णय घेतला आहे. पक्षाचे राष्ट्रीय अध्यक्ष शरद पवार यामध्ये कुठेच नाहीत. त्यांनी सांगितले की कार्यकर्त्यांना विचारात घ्या, त्याप्रमाणे निर्णय घ्या, त्यामुळे वेगवेगळ्या शहरांमध्ये वेगवेगळ्या निर्णय घेतला आहे. नाशिकमध्ये अजित पवार आणि एकनाथ शिंदे यांचा पक्ष एकत्र निवडणूक लढवीत आहेत. काल बारामतीच्या कार्यक्रमात एकत्र आलो म्हणून हा निर्णय झालेला नाही.अनेक दिवस याबद्दल चर्चा होती. स्थानिक लोकांसाठी एकत्र आलो आहोत. शरद पवार महापालिका निवडणुकीच्या प्रचारात नसतात, असेही त्यांनी एका प्रश्नाच्या उत्तरात सांगितले.
बारामती येथील गौतम आदानी भेटीबद्दल
आम्ही टाटा समूहाचे प्रमुख तसेच अंबानींना भेटलो आहे. जे जे कोणी महाराष्ट्रात मोठ्या प्रमाणात गुंतवणूक करतात, युवकांना काम देतात, संशोधन संस्थांना मदत करतात त्यांना भेटतो. आदानी याच्यामार्फत कृत्रिम बुद्धिमत्ता क्षेत्रात सीएसआर फ़ंडामार्फत तरुणासाठी रोजगार निर्मितीसाठी काय करता येईल, यांस प्राधान्य देत आहोत.
