पुणे: एमपीएससीचे अध्यक्ष मुख्यमंत्र्यांचे खास मित्र आहेत. मित्राला वाचवण्यासाठी लाखो स्पर्धा परीक्षार्थींना वाऱ्यावर सोडणे योग्य नाही. आम्ही शुद्धीकरणाचा ड्राफ्ट सरकारला दिला आहे. हे गरीब, शेतकरी, शेतमजुरांची मुले आहेत. अहंकार दाखवाल तर उद्या पालक आणि नागरिकही रस्त्यावर उतरतील. तेव्हा फोकस फक्त अध्यक्षांवर नाही, तर सरकारवर असेल. सायंकाळपर्यंत निर्णय घ्यावा, अन्यथा उद्याचे आंदोलन सरकारला परवडणारे नसेल, असा इशारा अमदार रोहित पवार यांनी रविवारी पत्रकार परिषदेत दिला.
पुणे, मुंबई आणि दिल्लीतील कारवाईचा संदर्भ देत पवार म्हणाले, महाराष्ट्र पोलिसांबद्दल आदर आहे. परंतु, पुण्यात विद्यार्थ्यांना हाताळताना चुकीची पद्धत अवलंबल्याने पोलिसांची प्रतिमा मलिन झाली आहे. दिल्ली पोलिसांबद्दल वेगळी प्रतिमा आहे. परंतु, महाराष्ट्र पोलिसांकडूनही तसेच होत असेल तर योग्य नाही.
दिल्लीतील आंदोलनावरून त्यांनी केंद्र सरकारवरही टीका केली. ४० हजार फौजफाटा दिल्लीत लावला आहे. रेल्वे, मेट्रो, पब्लिक ट्रान्सपोर्ट बंद आहे. आठ फुटी बॅरिकेड लावले आहेत. दिसेल त्याला उचलले जात आहे. अभिजित दिपकेला ताब्यात घेतले, त्यांच्या आजीचे निधन झाले तरी फोन करू दिला नाही, असा आरोप पवार यांनी केला.
तसेच, महाराष्ट्रातील विद्यार्थ्यांना दिल्लीला जाताना मध्य प्रदेशात ताब्यात घेऊन पुण्यात आणल्याचा मुद्दाही त्यांनी उपस्थित केला. आम्ही पुणे पोलिसांच्या वरिष्ठ अधिकाऱ्यांशी चर्चा करून विद्यार्थिनींना घरी सोडण्याची विनंती केली. त्यांना सोडले गेले, मात्र विलंबामुळे काहींना त्रास सहन करावा लागला असल्याचे मत देखील पवार यांनी व्यक्त केले.
‘समितीत तुकाराम मुंढेंचा समावेश करा’
शिष्टमंडळाच्या भेटीत न्यायालयीन चौकशीची चर्चा झाली होती. परंतु, अध्यक्ष पदावर असताना चौकशी पारदर्शक होणार नाही. त्यामुळे वॉचमनपासून अध्यक्षांपर्यंत चौकशी व्हावी आणि समितीत तुकाराम मुंढे यांच्यासारख्या अधिकाऱ्यांचा समावेश करावा, अशी मागणी असल्याचे देखील पवार यांनी स्पष्ट केले.
आमचे राजकारण हे समाजकारण...
राजकीय आंदोलनाच्या आरोपावर ते म्हणाले, मुख्यमंत्र्यांनी एसीत न बसता विद्यार्थ्यांशी संवाद साधावा. आमचे राजकारण समाजकारण आहे. दुष्काळग्रस्तांना मदत नसताना १२ कोटी ६८ लाखांच्या व्हीआयपी गाड्या आणि लंडनच्या खासगी कार्यक्रमासाठी १० कोटींचा खर्च होत असल्याची टीकाही त्यांनी केली.
