पुणे: पुणे पोलिसांनी पुणे, दिल्ली, कुरकुंभ, सांगली परिसरात छापे टाकून तीन हजार 700 कोटी रुपयांचे मेफेड्रोन जप्त केले. आरोपींच्या चौकशीत मेफेड्रोन तयार करण्यासाठी लागणाऱ्या कच्च्या मालाची माहिती मिळाली. या प्रकरणात अटक केलेल्या एका आरोपीने कच्चा माल विश्रांतवाडीत एका टेम्पोत लपवून ठेवल्याचे तपासात उघडकीस आल्यानंतर शनिवारी गुन्हे शाखेच्या पथकाने 340 किलो कच्चा माल जप्त केला. यात रासायनिक पदार्थांचा समावेश असून, त्याचा वापर मेफेड्रोन, मेथ असे अमली पदार्थ तयार करण्यासाठी केला जात असल्याचे पोलीस आयुक्त अमितेश कुमार यांनी सांगितले.
गुन्हे शाखेच्या पथकाने शनिवारी विश्रांतवाडीत छापा टाकला. तेथे एका टेम्पोत लपवून ठेवलेला कच्चा माल जप्त केला असून, कच्चा माल तपासणीसाठी न्यायवैद्यकीय प्रयोगशाळेत पाठवून देण्यात येणार आहे. तपासणीनंतर कच्च्या मालातील रासायनिक पदार्थांची माहिती मिळणार आहे, असे पालिस आयुक्तांनी नमूद केले.
मेफेड्रोन तस्करी देश-परदेशात करण्यात आली. पुणे-सोलापूर महामार्गावरील कुरकुंभ औद्योगिक वसाहतीत एका कारखान्यात मेफेड्रोन तयार केले जात होते. तेथे छापा टाकून कोट्यवधी रुपयांचे मेफेड्रोन जप्त केले. या प्रकरणात आतापर्यंत नऊ आरोपींना अटक केली असून, मेफेड्रोन तस्करीचा मुख्य सूत्रधार संदीप धुनिया परदेशात पसार झाल्याची माहिती मिळाली आहे. मेफेड्रोन विक्री प्रकरणात पोलिसांनी अटक केलेल्या आरोपींची चौकशी करण्यात आली.
तेव्हा आरोपींनी मेफेड्रोन तयार करण्यासाठी लागणारा कच्चा माल विश्रांतवाडीतील एका टेम्पोत लपवून ठेवल्याची माहिती मिळाली. त्यानंतर गुन्हे शाखेच्या पथकाने तेथे छापा टाकून 340 किलो कच्चा माल जप्त केला. पिंपरी-चिंचवड पोलिसांनी मेफेड्रोन विक्री प्रकरणात एका हॉटेल कामगाराला शुक्रवारी अटक केली. त्याच्याकडून दोन कोटी रुपयांचे मेफेड्रोन जप्त केले.
या प्रकरणात पिंपरीतील सहायक निरीक्षक विकास शेळके सामील असल्याचे उघडकीस आल्यानंतर पोलिसांनी त्याला अटक केली. याबाबत पोलिस आयुक्त अमितेश कुमार यांच्याकडे पत्रकारांनी प्रश्न उपस्थित केला. पुणे पोलिसांनी केलेला तपास आणि कारवाई कौतुकास्पद आहे. पोलिसांचा तपास योग्य दिशेने सुरू आहे, असे त्यांनी सांगितले. खोकल्याचे औषध (कफ सिरप) निर्मितीसाठी ज्या रासायनिक पदार्थांचा वापर केला जातो, त्याच पदार्थांचा वापर मेफेड्रोन, मेथ असे अमली पदार्थ तयार करण्यासाठी केला जात असण्याची शक्यता आहे.
