पुणे: केंद्र सरकारने मार्च महिन्यासाठी 22 लाख 50 हजार मेट्रिक टन इतका साखरेचा कोटा खुला केलेला आहे. वाढता उन्हाळा, शीतपेय उत्पादकांची वाढणारी मागणी, यात्रा-जत्रा, लग्नसराईमुळे साखरेस वाढती मागणी अपेक्षित असून, घोषित केलेला कोटा मागणीच्या तुलनेत कमी असल्याची घाऊक बाजारपेठेची धारणा आहे. त्यामुळे पुढील महिन्यात साखरेचे दर तेजीत राहण्याचा अंदाज व्यापाऱ्यांकडून वर्तविण्यात आला.
फेबुवारी महिन्यातील 28 दिवसांसाठी 22 लाख 50 हजार मेट्रिक टन इतकाच साखरेचा कोटा देण्यात आला होता, तर मार्च महिन्यातील 31 दिवसांसाठीही तेवढाच कोटा देण्यात आला असून, तो मागणीच्या तुलनेत कमी असल्याचे सांगण्यात येत आहे. मार्चसाठी किमान 23 लाख मे. टन इतका साखरेचा कोटा खुला होण्याचा अंदाज बाजारपेठेत होता. तो फोल ठरल्यामुळे मार्चमध्ये साखरेचे दर तेजीकडे झुकतील आणि वाढलेले दर स्थिरावतील, असे सांगण्यात आले.
सध्या कारखान्यांवर साखरेच्या निविदा प्रतिक्विंटलला 3,700 रुपयांवर जात आहेत. मार्च महिन्यातील नवीन निविदा उघडताच दर वाढण्याचा अंदाज बाजारपेठेला आहे. शिवाय सटोडियांकडून तेजीची हवा भरली जाण्याची अपेक्षा आहे. त्यातच मागणी वाढल्यास निश्चितच साखर दरवाढीस हातभार लागण्यास मदत होईल. दरम्यान, घाऊक बाजारात एस 30 ग््रेाड साखरेचा क्विंटलचा दर 4,000 ते 4,050 रुपयांवर सध्या स्थिर आहे.
देशात यंदा 293 लाख मे. टन साखर उत्पादन अपेक्षित
देशात दिनांक 1 ऑक्टोबर 2025 रोजी हंगामाच्या आरंभीस सुमारे 50 लाख मे. टन साखरेचा शिल्लक साठा होता. यंदा एकूण 324 लाख मे. टन साखर उत्पादनाचा अपेक्षित आहे. त्यापैकी 31 लाख टन साखर इथेनॉल उत्पादनासाठी वळविण्यात येईल. त्यातून प्रत्यक्षात साखरेचे उत्पादन 293 लाख मे. टन होण्याचा नवीन अंदाज आहे.
म्हणजेच, प्रत्यक्षात 343 लाख मे. टन साखर उपलब्ध होईल. साखरेचा देशांतर्गत खप 283 लाख मे. टन इतका आहे. तसेच केंद्राने घोषित केलेल्या सुमारे 7 लाख मे. टन साखर निर्यात अपेक्षित आहे. हे पाहता हंगामअखेरीस 53 लाख मे. टन इतका साखरेचा शिलकी साठा राहण्याचा अंदाज वर्तविण्यात येत आहे.
