टाकळी हाजी: मलठण (ता. शिरूर) परिसरातील दगडखाणी व स्टोन क्रशरमधील ब्लास्टिंग आणि धुळीमुळे शेती, फळबागा तसेच जमीन व संरक्षण कुंपणांचे नुकसान होत असल्याची तक्रार पुढे आली आहे. याप्रकरणी विलास थानमल पालरेशा यांनी महाराष्ट्र प्रदूषण नियंत्रण मंडळासह जिल्हाधिकारी, तहसीलदार व पोलिस प्रशासनाकडे लेखी तक्रार करून संबंधितांवर कारवाईसह नुकसानभरपाईची मागणी केली आहे.
पालरेशा यांच्या म्हणण्यानुसार, मलठण परिसरातील त्यांच्या जमिनीलगत असलेल्या भाऊसाहेब पाचंगे यांच्या भाग्यलक्ष्मी स्टोन क्रशरमधील ब्लास्टिंगमुळे संरक्षण कुंपण कोसळले असून, जमिनीला भेगा पडल्या आहेत. क्रशरमधून उडणाऱ्या धुळीमुळे आंबा, पेरू, चिकू, जांभूळ यांसह हजारो फळझाडांचे नुकसान झाले असून, अनेक झाडे खराब झाल्याचा दावा त्यांनी तक्रारीत केला आहे.
ब्लास्टिंग करताना आवश्यक सुरक्षित अंतर राखले जात नसल्याचा आरोपही करण्यात आला आहे. तसेच उत्खनन व खनिज वाहतुकीदरम्यान धूळ नियंत्रणासाठी पुरेशा उपाययोजना होत नसल्याने परिसरात धुळीचे लोट पसरत असल्याचे पालरेशा यांनी नमूद केले आहे.
पर्यावरणीय अटींची तपासणी करण्याची मागणी
खाणपट्टे व स्टोन क्रशरला परवानगी देताना वृक्षलागवड, धूळ नियंत्रण आणि सुरक्षिततेसंदर्भात विविध अटी घालण्यात येतात. संबंधित ठिकाणी या अटींचे पालन होते की नाही, याची प्रशासनाने प्रत्यक्ष पाहणी करावी, अशी मागणी केली आहे.
दोन वर्षांपासूनच्या तक्रारी प्रलंबित
या प्रश्नाबाबत गेल्या दोन वर्षांपासून जिल्हाधिकारी, तहसीलदार, प्रदूषण नियंत्रण मंडळ आणि पोलिस प्रशासनाकडे तक्रारी केल्याचे पालरेशा यांनी सांगितले. मात्र, अद्याप ठोस कारवाई झालेली नसल्याचा त्यांचा दावा आहे. त्यामुळे प्रशासनाने प्रत्यक्ष पाहणी करून नुकसानीचे मूल्यांकन करावे आणि नियमभंग आढळल्यास संबंधितांवर कारवाई करावी, अशी मागणी केली. तक्रारीतील आरोपांची प्रत्यक्ष पाहणी व चौकशी झाल्यानंतरच वस्तुस्थिती स्पष्ट होणार आहे. याबाबत शिरूरचे तहसीलदार बाळासाहेब म्हस्के यांच्याशी संपर्क होऊ शकला नाही.
