पुणे : पुढारी वृत्तसेवा : मराठी ही ज्ञानभाषा व्हावी तसेच ती उद्योगाची आणि रोजगाराची भाषा व्हावी, यासाठी विद्यापीठीय स्तरावर शिकविल्या जाणार्या सर्व विद्याशाखांमध्ये मराठी हा विषय अनिवार्य करावा, असा ठराव सावित्रीबाई फुले पुणे विद्यापीठाच्या मराठी अभ्यास मंडळाच्या बैठकीत शुक्रवारी (दि. 25) करण्यात आला. अभ्यास मंडळाचे अध्यक्ष डॉ. संदीप सांगळे यांच्या अध्यक्षतेखाली अभ्यास मंडळाची बैठक विद्यापीठाच्या प्रशासकीय इमारतीत पार पडली. मागील काही वर्षांपासून शैक्षणिक आणि सामाजिक जीवनात मातृभाषेकडे दुर्लक्ष केले जात आहे, त्यामुळे भाषा टिकविण्यासाठी तसेच मराठी भाषेची व्याप्ती वाढविण्यासाठी महाविद्यालयीन स्तरावर प्रत्येक विद्याशाखेत शिक्षण घेणार्या विद्यार्थ्यांना मराठी भाषा शिकविली जावी.
विद्यापीठीय स्तरावर मातृभाषा शिकविल्यास ती व्यवसायाची, उद्योगाची आणि ज्ञानभाषा होण्यास मदत होईल, अशी चर्चा या बैठकीत झाली. त्यानंतर मराठी भाषा अनिवार्य करण्याचा ठराव बैठकीत एकमताने मांडण्यात आला. अभ्यास मंडळाचे अध्यक्ष डॉ. संदीप सांगळे म्हणाले, 'नवीन शैक्षणिक धोरणात प्रादेशिक भाषांना अनन्यसाधारण महत्त्व देण्यात आले आहे. सावित्रीबाई फुले पुणे विद्यापीठाच्या विविध विद्याशाखेत व्यवसायिक अभ्यासक्रमात मराठी भाषा व साहित्य अनिवार्य करणे ही काळाची गरज आहे. त्यामुळे मराठी विषयाकडे पाहण्याचा दृष्टिकोन विकसित होईल.
मराठी विषय घेऊन करिअर करू इच्छिणार्यांना व बेरोजगार तरुणांना रोजगार मिळण्याची संधी उपलब्ध होईल. विविध व्यावसायिक अभ्यासक्रमात क्रमिक पुस्तके व अध्ययन मराठीतून होणे गरजेचे आहे. तशी संधी नवीन शैक्षणिक धोरणात प्राप्त झाली आहे. मराठीतून शिक्षण देण्याच्या मागणीसाठी राज्यपाल, उच्च शिक्षण मंत्री तसेच विद्यापीठाचे कुलगुरू यांच्या भेटी घेऊन मराठी भाषा अनिवार्य करण्याबाबत आग्रह धरण्यात येणार आहे.' या बैठकीला अभ्यास मंडळाचे माजी अध्यक्ष डॉ. शिरीष लांडगे, सदस्य डॉ. सुधाकर शेलार, डॉ. प्रमोद आंबेकर, डॉ. शांताराम चौधरी, डॉ. पोर्णिमा घोडके, डॉ. सुरेश जाधव, राजीव बर्वे, डॉ. शीतल गोर्डे पाटील, डॉ. शोभा तितर, संजय ऐलवाड आदी उपस्थित होते.
हेही वाचा :
