पुणे: नवीन वीजमीटर जोडणीसाठी ठेकेदाराकडून दोन लाख रुपयांची लाच घेताना महावितरणमधील वायरमनला लाचलुचपत प्रतिबंधक विभागाने (एसीबी) रंगेहाथ पकडले. देहू गावात ही कारवाई झाली. गजानन बाळासाहेब चट्टे (वय ३५, सध्या रा. मिडास रिजन्सी, देहू बायपास रस्ता, ता. खेड, जि. पुणे, मूळ रा. हट्टा, ता. वसमत, जि. हिंगोली) असे अटक करण्यात आलेल्याचे नाव आहे. याबाबत एका ठेकेदाराने लाचलुचपत प्रतिबंधक विभागाकडे तक्रार दिली आहे.
लाचलुचपत प्रतिबंधक विभागाने दिलेल्या माहितीनुसार, तक्रारदार हे शासकीय ठेकेदार आहेत. खेड तालुक्यातील येलवाडी गावात एका महिलेने एक गुंठा जमीन खरेदी केली होती. आरोपी चट्टे हा येलवाडी महावितरण कार्यालयात वायरमन आहे.
महिलेने ठेकेदारामार्फत नवीन वीजमीटर बसविण्यासाठी ठेकेदारामार्फत महावितरणकडे ऑनलाइन अर्ज केला होता. त्यानंतर चट्टे हा ठेकेदाराला भेटला. या भागात ११ गुंठे जमीन आहे. येथे वीजमीटर बसविण्यासाठी दोन लाख रुपयांची लाच ठेकेदाराकडे मागितली होती.
ठेकेदाराने याबाबत तक्रार दिली. तक्रारीची पडताळणीनंतर देहू गावातील भैरवनाथ चौकात सापळा लावण्यात आला. तक्रारदार ठेकेदाराकडून ११ मीटर बसविण्यासाठी दोन लाख रुपयांची लाच घेणाऱ्या चट्टे याला लाचलुचपत प्रतिबंधक विभागाच्या पथकाने सापळा लावून पकडले.
चट्टे याला अटक करण्यात आली. पोलिस अधीक्षक शिरीष सरदेशपांडे, अतिरिक्त अधीक्षक अजित पाटील, अर्जुन भोसले यांच्या मार्गदर्शनाखाली पोलीस निरीक्षक संतोष पाटील आणि पथकाने ही कारवाई केली. सहायक आयुक्त भारती मोरे तपास करत आहेत.
