पुणे: प्रेमसंबंधांच्या कारणातून तरुणीच्या नातेवाइकांकडून लग्नासाठी होणारी पैशांची मागणी आणि मारहाण करत दिलेल्या मानसिक त्रासाला कंटाळून एका तरुणाने गळफास घेऊन आत्महत्या केली. विशाल भैरम काळे (वय २१, रा. हुडको कॉलनी, पाणी टाकीजवळ शिरूर, सध्या कोरेगाव पार्क सिग्नलच्या पदपथावर) असे आत्महत्या केलेल्या तरुणाचे नाव आहे.
याप्रकरणी तरुणाच्या ३२ वर्षीय बहिणीने दिलेल्या फिर्यादीनुसार कोरेगाव पार्क पोलिसांनी चैत्राली उर्फ चैतू चंदू भोसले, रोहित चंदू भोसले, रुषिकेश चंदू भोसले, कोला काळुराम काळे, परशान तुकाराम काळे (रा. सर्व मूळ गाव हुडको कॉलनी, सध्या कोरेगाव पार्क सिग्नलच्या पदपथावर) यांच्याविरुद्ध गुन्हा दाखल केला आहे.
ही घटना ३० मे ते १ जूनदरम्यानच्या कालावधीत कोरेगाव पार्क कल्याणीनगर चौक सिग्नल तसेच वढू बु., शिवलेवस्ती येथील ओढ्याच्या कडेला घडली आहे. पोलिसांच्या माहितीनुसार, आत्महत्या केलेला तरुण विशाल काळेचे आरोपींच्या नात्यातील एका तरुणीसोबत प्रेमसंबंध होते.
त्याच कारणातून आरोपींनी तरुणाकडे तरुणीसोबत लग्न करण्यासाठी पैशांची मागणी केली होती. तसेच त्याला मारहाण केली. सतत होणारा जाच आणि मानसिक त्रासाला कंटाळून विशालने वढू बुद्रुक येथील शिवलेवस्तीमधील ओढ्याच्या कडेला असलेल्या लिंबाच्या झाडाला दोरीच्या साह्याने गळफास घेऊन १ जून रोजी आत्महत्या केली.
सुरुवातीला याप्रकरणी शिरुर पोलिस ठाण्यात गुन्हा दाखल केला होता. मात्र हा प्रकार कोरेगाव पार्क पोलिस ठाण्याच्या हद्दीतील असल्याने कोरेगाव पार्क पोलिस ठाण्यात वर्ग करण्यात आला आहे. पुढील तपास महिला पोलिस उपनिरीक्षक अश्र्विनी वनवे करत आहेत.
