राजगुरुनगर: गणेशोत्सव काळात खेड पोलिसांनी बुधवारी (दि १६ ) एकाच दिवशी अवैध दारू विक्री आणि मटका धंद्यावर मोठी कारवाई केली. कनेरसर, कडधे आणि ठाकुर पिंपरी येथे अवैध दारू विक्रीवर सापळा रचून धाड टाकली, तर राजगुरुनगर शहरात अवैध जुगार आणि मटका धंद्यावर छापा टाकला. गणेशोत्सव काळात झालेल्या या कारवाईमुळे नागरिकां मधुन समाधान व्यक्त होत आहे.
खेड तालुक्यातील तीन ठिकाणी अवैध दारू विक्रीचे प्रकार समोर आल्यानंतर पोलिसांनी गुप्त माहितीच्या आधारे सापळा रचला. कनेरसर, कडधे आणि ठाकुर पिंपरी येथे पोलिसांनी अचानक छापे टाकून अवैध दारू विक्री करणाऱ्यांना लक्ष्य केले. या कारवाईत संबंधित ठिकाणांहून दारू जप्त करण्यात आली असून, दारू अड्डा चालविणाऱ्या ४ जणांना मुद्देमालासह ताब्यात घेतले आहे.
राजगुरुनगर शहरातही पोलिसांनी अवैध जुगार आणि मटका धंद्यावर छापा टाकला. गणेशोत्सव काळात शहरात मटका आणि जुगार यासारखे अवैध प्रकार वाढत असल्याच्या तक्रारींनंतर पोलिसांनी ही कारवाई केली. छाप्यात संबंधित ठिकाणांहून जुगार सामग्री जप्त करण्यात आली आणि आरोपींविरुद्ध कारवाई सुरू केली आहे.
खेड पोलिसांच्या या एकाच दिवसातील दोन्ही कारवाया नागरिकांसाठी दिलासादायक ठरल्या आहेत. स्थानिक नागरिकांनी पोलिसांच्या या कठोर भूमिकेचे स्वागत केले असून, गणेशोत्सव काळात शांतता आणि कायदा-सुव्यवस्था राखण्यासाठी अशा कारवाया आवश्यक असल्याचे मत व्यक्त केले आहे.
पोलिस निरीक्षक सुभाष चव्हाण यांनी या बाबत सांगितले की, अवैध दारू विक्री आणि मटका धंदा या दोन्ही प्रकारांवर कठोर कारवाई सुरूच राहील. कोणत्याही तक्रारींवर त्वरित कारवाई केली जाईल, असेही ते म्हणाले.
