कात्रज-कोंढवा रस्त्याच्या भूसंपादनासाठी पाहणी

पुणे; पुढारी वृत्तसेवा : बहुचर्चित कात्रज – कोंढवा रस्त्याच्या भूसंपादनासाठी राज्य सरकारकडून 200 कोटींचा निधी मिळणार आहे. या अनुषंगाने महापालिका अधिकार्‍यांनी नुकतीच कात्रज-कोंढवा रस्त्याची पाहणी केली. नगर रस्ता, सोलापूर रस्ता, सासवड रस्ता या भागांतून येणारी अवजड वाहने कात्रज – कोंढवा रस्त्यावरून मुंबईच्या दिशेने जातात. त्यातच रस्त्याच्या दोन्ही बाजूंना मोठ्या प्रमाणात नागरी वस्ती झाल्याने रस्त्यावरील वाहनांची संख्या वाढली आहे. परिणामी, या रस्त्यावर वाहतूक कोंडी होत आहे. वाहतूक कोंडीचा प्रश्न सोडविण्यासाठी महापालिकेने कात्रज ते कोंढवा येथील खडी मशीन चौकदरम्यानच्या रस्त्याचे रुंदीकरण करण्याचे काम हाती घेतले आहे.

हा सुमारे 3 किलोमीटरचा रस्ता 84 मीटर रुंद करण्यात येणार होता. चार वर्षांपूर्वी त्याचे भूमिपूजनही झाले. पण जागा ताब्यात नसल्याने हा प्रकल्प अर्धवट राहिला आहे. 84 मीटरचा रस्ता करण्यासाठी भूसंपादनासाठी सुमारे 700 कोटी रुपये खर्च येणार होता. तेवढे पैसे महापालिकेकडे नाहीत, त्यामुळे 50 मीटरचा रस्ता करण्याचा निर्णय घेतला.

त्यासाठी जागामालकांना नुकसानभरपाई देण्यासाठी 200 कोटी रुपये मिळणार आहेत. ही प्रक्रिया होण्यास काही महिन्यांचा कालावधी लागणार आहे. त्यासाठी अतिरिक्त आयुक्त विकास ढाकणे यांनी कात्रज-कोंढवा रस्त्याची पाहणी केली. त्यात शत्रुघ्न चौकातील इलेक्ट्रीक केबल काढण्यात येणार आहे. अनेक ठिकाणची झाडे काढण्यात येणार आहे. या रस्त्यावरील वाहतूक कोंडी टाळण्यासाठी दुभाजक टाकण्यात  येणार आहे.