पुणे: बोपोडी येथील सरकारी जमीन गैरव्यवहार प्रकरणात गुन्हा दाखल असलेला तत्कालीन तहसीलदार सूर्यकांत येवले याचा अटकपूर्व जामीन अर्ज जिल्हा व सत्र न्यायाधीश पी. वाय. लाडेकर यांच्या न्यायालयाने सोमवारी फेटाळला. शासकीय जमीन असतानाही येवले याने तत्कालीन महसूलमंत्री आणि अप्पर जिल्हाधिकारी यांच्या आदेशाकडे जाणीवपूर्वक दुर्लक्ष केले, असा युक्तिवाद सरकारपक्षातर्फे जिल्हा सरकारी वकील प्रमोद बोंबटकर यांनी केला. तो ग््रााह्य धरत न्यायालयाने जामीन अर्ज नामंजूर केला. याबाबत नायब तहसीलदार प्रविणा बोर्डे यांनी सरकारतर्फे तक्रार दिली आहे.
या प्रकरणात अटकपूर्व जामिनासाठी येवले याने न्यायालयात अर्ज केला होता. त्याच्या वतीने युक्तिवाद करताना ॲड. हर्षद निंबाळकर म्हणाले की, या प्रकरणात कूळ आहे की नाही हे ठरविण्याचा अधिकार येवले यांना असून, त्यांनी प्राधिकरण म्हणून याबाबतचा निकाल दिला होता. तब्बल नऊ महिने याबाबत सुनावणी झाली.
दोन्ही बाजूंचा युक्तिवाद झाल्यानंतर हा निकाल देण्यात आला होता. तसेच अपिलासाठी देखील वेळ देण्यात आली होती. त्यांनी दिलेला निर्णय बरोबर आहे की नाही, याबाबत योग्य त्या ठिकाणी अपील करणे आवश्यक आहे. त्यासाठी फौजदारी कारवाई योग्य नाही. तसेच त्यांच्यावर लावण्यात आलेली तीनही कलमे यात लागू होत नाहीत. त्यामुळे त्यांनी केलेला अटकपूर्व जामिनाचा अर्ज मंजूर करण्यात यावा, असा युक्तिवाद ॲड. निंबाळकर यांनी केला.
सरकारपक्षातर्फे जिल्हा सरकारी वकील प्रमोद बोंबटकर म्हणाले की, जमिनीबाबत तत्कालीन महसूलमंत्र्यांनी दोनवेळा रीग््राांटचा अर्ज नामंजूर केला होता. गुन्ह्यातील आरोपी शीतल तेजवानी हिने उच्च न्यायालयात वतनदारांच्या वतीने केलेली रीट याचिका फेटाळली असताना अमेडीया कंपनीच्या पत्रावरून बोटॅनिकल सर्वे ऑफ इंडियाला जमीन खाली करण्याचे निर्देश येवले याने दिले. व्यावसायिकांशी संगनमत करून शासनाच्या जमिनीची विल्हेवाट लावली.
यातून त्याचा हेतू दिसून येतो. महाराष्ट्र कुळवहिवाट व शेतजमीन कायद्यानुसार शासकीय जमिनी कुळवहिवाटीमधून वगळलेल्या असताना त्यासंबंधी हेतुपुरस्सर खासगी विकसकांच्या बाजूने निर्णय दिला. या गुन्ह्यात येवले हा प्रमुख आरोपी असून, त्याच्या पुढाकाराने व सहकार्यानेच हा गुन्हा घडला आहे, असा युक्तिवाद ॲड. बोंबटकर यांनी केला. न्यायालयाने बचावपक्षासह सरकारपक्षाचा युक्तिवाद ऐकून घेत जामीन फेटाळून लावला. या गुन्ह्याचा तपास आर्थिक गुन्हे शाखेचे सहायक पोलिस निरीक्षक दत्तात्रेय वाघमारे करत आहेत.
