बारामती: मुलाने आत्महत्या केल्याचा राग मनात धरून त्यासाठी एका अल्पवयीन मुलीला जबाबदार धरत तिला त्रास दिला. यातून त्या मुलीला आत्महत्या करण्यास प्रवृत्त केल्याप्रकरणी दोघांविरोधात बारामती तालुका पोलिस ठाण्यात गुन्हा दाखल करण्यात आला.
किशोर धनाजी मोरे व शुभांगी ईश्वर मोरे (रा. बऱ्हाणपूर, ता. बारामती) अशी गुन्हा दाखल झालेल्यांची नावे आहेत. बुधवारी (दि. 18) सायंकाळी शहरातील जळोची परिसरात एका अपार्टमेंटमध्ये ही घटना घडली. आत्महत्या केलेल्या 16 वर्षीय मुलीच्या आईने याबाबत तालुका पोलिस ठाण्यात फिर्याद दिली.
मोरे यांच्या मुलाने आत्महत्या केली होती. त्याचा राग मनात धरून त्यासाठी अल्पवयीन मुलीला जबाबदार ठरवत तिला त्रास दिला गेला. त्यातून ती मानसिकदृष्ट्या खचल्याने तिने गळफास घेत आत्महत्या केली. घटनेच्या दिवशी मुलीचे वडील व भाऊ तिच्या मामाच्या गावी एका कार्यक्रमासाठी गेले होते.
तिची आई व ती दोघीच घरी होत्या. परंतु, मुलगी तणावात असल्याने काही बोलत नव्हती. दरम्यान, तिची आई व ती टेरेसवर उन्हाळी वाळवणाची कामे करत होत्या. काही वेळाने मुलगी तेथून खाली घरामध्ये आली. काही वेळाने आई घरी आली असता मुलीने सेफ्टी दरवाजा लावून घेतल्याचे दिसून आले.
अनेकदा आवाज देऊनही तिने कडी काढली नाही. त्यामुळे शेजाऱ्यांच्या मदतीने खिडकीची काच तोडून लाकडाच्या मदतीने दरवाजाची कडी काढण्यात आली. आतमध्ये जात पाहणी केली असता बेडरूमध्ये या मुलीने आत्महत्या केल्याचे दिसून आले.
