Vaishnavi Hagawane Case
बारामती: वैष्णवी हगवणे आत्महत्या प्रकरणावरून सुरु असलेल्या आरोपांबाबत उपमुख्यमंत्री अजित पवार यांनी बारामतीत भूमिका स्पष्ट केली. लग्नाला उपस्थित राहिलो म्हणून मी दोषी कसा, असा सवाल उपस्थित करत पवार यांनी माध्यमांवर आगपाखड केली. जो दोषी असेल त्याला फासावर लटकवा पण उगाच अजित पवार.. अजित पवार.. करून मला बदनाम का करता? असा सवाल पवार यांनी उपस्थित केला. फरार राजेंद्र हगवणेला अटक कऱण्यासाठी सहा पथके पाठवा असे मी पोलिस आयुक्तांना सांगितले असल्याचेही ते म्हणाले. (Pune News Update)
पवार म्हणाले, मला अनेक लग्नाची निमंत्रणे येतात. शक्य असेल तेथे मी उपस्थित राहतो. तसा त्या ही लग्नात उपस्थित होते. मोटारीची चावी देतानाही मी ही स्वखुशीने दिली जात आहे का याची विचारणा केली होती. बळजबरीने मोटार दिलीय का हे ही विचारले होते. शिवाय बळजबरीने घेतली असेल तर सांग मग मी बघतो असेही म्हणाला होतो. मी एवढा कडक वागतो तरी माझ्यावर हे आरोप कशासाठी ? असे पवार माध्यमांना म्हणाले
मी लग्नाला उपस्थित राहिलो आणि उद्या एखाद्याने सुनेबाबत वेडीवाकडी वागणूक दिली तर अजित पवारचा काय संबंध ? असे पवार म्हणाले. मला तर काय कळेनाच.. वाहिन्यांवर अजित पवार लग्नाला उपस्थित होते. हे अन ते असे दाखवले जात आहे. मी घटना घडल्यावर लगेचच पिंपरी चिंचवडच्या पोलिस आयुक्तांना अॅक्शन घ्यायला लावली. जिने आत्महत्या केली तिची सासू, नणंद, पती आतमध्ये आहे. सासरा फरार आहे, पण तो पळून पळून कुठे जाईल. सहा पथके तयार करून शोधा पण त्याला मुसक्या बांधूनच आणा, असे मी आयुक्तांना सांगितले आहे. तरी पण वाहिन्यांवर सारखं अजित पवार.. अजित पवार सुरु आहे. अरे बाबा माझा काय संबंध आहे. प्रेमापोटी मला लग्नाला जावे लागते. नाही तर माणूस रुसतोय. मी लग्नाला गेलो म्हणजे मी सुनेशी असे वागा म्हणून सांगतो का, असा सवाल पवार यांनी केला.
माझ्यासारख्या पठ्ठ्यानेच लाडक्या बहिणींना दीड हजार रुपये सुरु केले. या आधी कोणत्या मायच्या लालने दिले होते का. हगवणे प्रकरणात जो कोणी दोषी असेल त्याला फासावर लटकवा. पण माझी बदनामी करू नका. माध्यमांना मोकळीकीचा अधिकार दिला म्हणून कोणाची पण नावे घेता का,? असा सवाल पवार यांनी केला. मी एवढा आवाज काढून अधिकारवाणीने बोलतो म्हणजे मी पाच पैशाला मिंधा नाही.
हगवणे प्रकरणात बावधन पोलिस ठाण्यात १७ तारखेलाच गुन्हा दाखल आहे. पोलिस आयुक्त मला रोज रिपोर्टींग करत आहेत. तो माझा पदाधिकारी नाही. पक्षाचा सदस्य असेल तर त्याची हकालपट्टी केली जाईल. असली नालायक माणसं माझ्या पक्षात नको. मी दहादा गरीबाच्या दारात जाईल. पण असल्या भडव्यांच्या दारात जाणार नाही, असे पवार म्हणाले.
बदनामी करणाऱयांना मी जवळ करणार नाही. हगवणे प्रकरणात प्रेमविवाह होता. त्यात माझा दुरान्वये संबंध नाही. त्यांचे बाळ आता आनंदराव धसपटे यांच्या ताब्यात दिले आहे. जे काही करायचे ते सगळे मी केले आहे. पण तरीही चॅनेलला अजित पवारांचा पक्ष... अजित पवारांचा पक्ष असेच चालले आहे. मी परवा पुण्यात गेल्यावर मिडियालाही हे विचारणार आहे की एखादा माझ्या पक्षाचा असला तर त्याला मी चूक करायला सांगतो का? माझ्या जवळचा असला तरी त्याला टायरमध्ये घ्या, सोडू नका साल्याला ? असेच मी पोलिसांना सांगत असतो, असे पवार म्हणाले.
