घृणास्पद ! एका मुलीवर दोघांचा चार वर्षे अत्याचार

भिगवण : पुढारी वृत्तसेवा : इंदापूर तालुक्यात एका मुलीवर दोघा जणांनी सतत धमक्या देऊन चार वर्षे अत्याचार केल्याचा खळबळजनक प्रकार उघडकीस आला आहे. मुलीच्या फिर्यादीवरून भिगवण व सिद्धेश्वर निंबोडी येथील दोघांवर धमकी देऊन बलात्कार केल्याचा गुन्हा दाखल करण्यात आला आहे. यामध्ये एका प्रसिद्ध व्यापार्‍याच्या मुलाचा समावेश आहे. आकाश ऊर्फ बंटी पिसाळ (रा. तक्रारवाडी, ता. इंदापूर) व साहिल अमीन शेख (रा. सिद्धेश्वर निंबोडी, ता. बारामती) या दोघांवर बलात्काराचा गुन्हा दाखल करण्यात आला आहे.

संबंधित बातम्या :

• चिकन, मटणाला मागणी वाढली
• Crime News : खंडणीखोर दोघा कथित पत्रकारांवर गुन्हा
• धुळे : शिक्षणाधिका-यासह, वरिष्ठ सहाय्यकाला लाच घेताना अटक

याबाबत माहिती अशी की, पीडित मुलीची परिस्थिती गरीब असल्याने व तिला शिक्षण पूर्ण करायचे असल्याने ती दुकानात कामाला येत असे. यावरून आकाश ऊर्फ बंटी पिसाळ याने तिचा पाठलाग करून व प्रेमाचा प्रस्ताव ठेवला व तिचा पाठलाग सुरू केला. सततच्या या त्रासाला कंटाळून मुलीने कामाची जागा बदलली तरीही आकाश त्रास देत होता. हा प्रकार घरी सांगितला असता तर पुढील शिक्षणासाठी अडचणी आल्या असत्या म्हणून भीतीपोटी पीडितेने घरी काही सांगितले नाही, असे फिर्यादीत म्हटले आहे.

यावर आकाश याने फ्रेंडशिपची नवी शक्कल लढवली व मोबाईल नंबर मिळवून जवळीक साधत मोबाईलवर चॅटिंग करू लागला. याच दरम्यान आपण जिथे कामाला होतो तिथे साहिल आमीन शेख हाही माझ्यावर नजर ठेवून होता. त्याने आपले काही आक्षेपार्ह व्हिडीओ बनवले होते व ते व्हायरल करण्याची धमकी देत त्रास देत होता. मदतीच्या अपेक्षाने ही बाब आपण आकाश पिसाळ यास सांगितली. यावर त्याने त्यासाठी प्रेमाचा प्रस्ताव मांडला. त्यानंतर त्याने आपल्याला भेटीच्या निमित्ताने बोलावून अत्याचार केला व पुढेही करीत राहिला.

याचप्रमाणे साहिल यानेही आपल्याला फोटो व व्हिडीओ व्हायरल करण्याची धमकी देत बारामती व भिगवण भागात बलात्कार केले. हा प्रकार 2019 पासून ते 2023 पर्यंत चालू असल्याचे फिर्यादीत म्हटले आहे. 2023 मध्ये या दोघांनी फोटो व व्हिडिओ इन्स्टाग्राम, यु-ट्युब, सोशल मीडियावर व्हायरल करण्याची धमकी देत वारंवार आपल्यावर अत्याचार केल्याचेही फिर्यादीत म्हटले आहे. दरम्यान, दोघांच्या या कृत्याला कंटाळून आपण साहिल शेख व आकाश पिसाळ याला आत्महत्या करण्याच्या विचार मनात येत असल्याचेही कळवले होते. मात्र, दोघांवर याचा काही परिणाम झाला नाही, उलट जिवे मारण्याची धमकी देत आपल्यावर अत्याचार चालूच ठेवले होते. यावरून आपण कंटाळून अखेर पोलिसात तक्रार दिल्याचे संबंधित मुलीने म्हटले आहे. यावर भिगवण पोलिसांनी दोघांविरुद्ध पोलिस ठाण्यात गुन्हा दाखल केला आहे.