पुणे : पुढारी वृत्तसेवा
प्रधानमंत्री मुद्रा कर्ज योजनेचा एजंट असल्याचे भासवून मुद्रा कर्ज देण्याच्या बहाण्याने प्रोसेसिंग फी स्वरूपात 2 लाख 80 हजारांची फसवणूक केल्याचा धक्कादायक प्रकार समोर आला आहे. याप्रकरणी अज्ञात मोबाईल धारक व्यक्तीवर फसवणूकीचा गुन्हा दाखल करण्यात आला आहे. याबाबत कात्रज येथे राहणार्या एका 32 वर्षीय महिलेनी भारती विद्यापीठ पोलिस ठाण्यात फिर्याद दिली आहे.
गुन्हे निरीक्षक संगिता यादव यांनी सांगितले, फिर्यादी यांचा ट्रॅव्हलचा व्यावसाय आहे. कोरोना काळात त्यांच्या व्यावसायात तोटा झाला होता. त्यांना व्यावसायात वृध्दी करण्यासाठी कर्ज हवे होते. त्यासाठी त्यांनी ऑनलाईन कर्ज कोठे मिळते आहे का? अशी माहिती मिळविण्याचा प्रयत्न केला. त्यावर त्यांना अज्ञात मोबाईलधारक आरोपीचा फोन आला. त्याने फिर्यादी यांना प्रधानमंत्री मुद्रा कर्ज मिळवून देण्याचे आमिष दाखविले.
फिर्यादीचा विश्वास संपादन केल्यानंतर त्याने त्यांना कर्ज मिळविण्यासाठी प्रोसेसिंग फी स्वरूपात 2 लाख 80 हजार 675 रूपये भरण्यास सांगितले. त्यानुसार त्यांनी पैसे भरले परंतु, जानेवारी 2021 मध्ये कर्जासाठी प्रोसेस करूनही कर्ज न मिळाल्याने व आपली फसवणूक झाल्याचे निष्पन्न झाल्यानंतर महिलेनी भारती विद्यापीठ पोलिस ठाणे गाठून पोलिस ठाण्यात फिर्याद दिली. पुढील तपास गुन्हे निरीक्षक संगिता यादव करीत आहेत.
