Pune Police : पोलीस शिपायाकडून महिला पोलिस निरीक्षकावर हल्ला; चौकीच्या दारातच विनयभंग

पुणे : तक्रार देण्यास आलेल्या महिला पोलिस निरीक्षकावर, पोलिस चौकीच्या दारातच हल्ला करून विनयभंग केल्याचा प्रकार समोर आला आहे. याप्रकरणी सिंहगड रोड पोलिसांनी  मुंबई पोलिस दलातील फोर्स वनच्या कर्मचार्‍यावर गुन्हा दाखल करून त्याला अटक केली आहे. नीलेश आंद्रेश भालेराव (रा. सांताक्रुझ, मुंबई) असे या पोलिस कर्मचार्‍याचे नाव आहे.

ही घटना रविवारी (दि. 3) दुपारी पावणेतीन वाजताच्या सुमारास घडली. फिर्यादी या अभिरुची पोलिस चौकीत आरोपीविरुध्द  तक्रार देण्यासाठी आल्या होत्या. तक्रार देऊन बाहेर पडत असताना आरोपीने त्यांच्यावर हल्ला चढवून विनयभंग केला. दरम्यान,  फिर्यादीने 2018 रोजी आरोपीवर वानवडी पोलिस ठाण्यात गुन्हा दाखल केला होता.

तेव्हा त्याच्या घरच्यांच्या विनंतीवरून तक्रार मागे घेण्यात आली होती. यानंतर तो पुन्हा फिर्यादींना फोन करून त्रास देत होता. याची तक्रार देण्यास त्या पतीसमवेत अभिरुची चौकीत गेल्या होत्या. आरोपी नीलेशही तेथे आला. तेथे येऊन त्याने तुम्ही माझा त्रास आणखीनच वाढवला, असे म्हणत चौकीतून बाहेर पडताच हल्ला करून विनयभंग केला. या प्रकरणाचा तपास सहायक पोलिस निरीक्षक चंदनशिव करत आहेत.