खडकवासला : पुढारी वृत्तसेवा
मान्सूनची चाहूल लागल्याने गडावर पर्यटकांची वर्दळ दुपटीने वाढली आहे. सिंहगड घाट रस्त्यावर पावसाळ्यात दरडी कोसळण्याचा धोका आहे. त्यामुळे प्रशासनाने घाट रस्त्यावरील उर्वरित दरडी संरक्षित करण्यासाठी कार्यवाही सुरू केली आहे. यासाठी वनखात्याने दीड कोटी रुपयांचा निधी सार्वजनिक बांधकाम विभागाला दिला आहे.
पंधरा वर्षापूर्वी घाट रस्त्याचे रुंदीकरण करण्यात आले. रुंदीकरणासाठी तोडण्यात आलेल्या कडेकपारीच्या दरडी पावसाळ्यात कोसळू लागल्या. आता डोंगरउताराच्या घाट रस्त्यावर असलेल्या दरडी मुरुम मातीच्या आहेत. त्यामुळे या दरडी आधुनिक तंत्रज्ञानाच्या साह्याने संरक्षित करण्यात येणार आहेत.
सार्वजनिक बांधकाम विभागाचे शाखा अभियंता नामदेव राठोड म्हणाले, की मुंबईतील आयआयटी संस्थेच्या तज्ज्ञांकडून घाट रस्त्यावर कोसळणार्या संभाव्य दरडींची पाहणी करण्यात येणार आहे. खडक, कड्यातील दरडी संरक्षित करण्यासाठी लोखंडी जाळी लावण्यात आली आहे. मात्र मुरुम मातीच्या दरडी संरक्षित करण्यासाठी आधुनिक तंत्रज्ञान वापरण्यात येणार आहे.
उपलब्ध दीड कोटी रुपयांचा निधी यासाठी खर्च करण्यात येणार आहे. त्यासाठी कार्यवाही सुरू आहे.
पर्यटकांची सिंहगडावर झुंबड उडते. पावसाळ्यात गडाच्या पाऊल वाटा, बुरुज, तटबंदीचे मार्ग निसरडे होतात. गडावर फिरताना सावधनता बाळगावी, असे आवाहन वनविभागाने केले आहे.
घाट रस्त्यावर पावसाळ्यात उन्मळून येणार्या दरडी संरक्षित करण्यात येणार आहेत. सद्य:स्थितीत दरडींचा धोका नाही. पर्यटकांच्या सुरक्षेसाठी आवश्यक यंत्रणा उभी केली आहे. घाट रस्त्याची पाहणी करून बांधकाम खात्यामार्फत दरडी संरक्षित करण्यात येणार आहेत.
– प्रदीप सकपाळ वनपरिक्षेत्र अधिकारी, पुणे (भांबुर्डा) वनविभाग
