Jalgaon Municipal Corporation Politics
जळगाव : जळगाव महानगरपालिकेच्या राजकारणात आज एक ऐतिहासिक अध्याय लिहिला गेला. महायुतीकडून महापौरपदी भाजपच्या दीपमाला काळे आणि उपमहापौरपदी शिवसेनेचे मनोज चौधरी यांची बिनविरोध निवड निश्चित झाली आहे. ‘जीएम फाउंडेशन’ येथे झालेल्या नगरसेवकांच्या बैठकीत जलसंपदा मंत्री गिरीश महाजन यांनी या नावांची अधिकृत घोषणा केली.
राज्यात पहिल्यांदाच इतक्या मोठ्या महानगरपालिकेत महापौर व उपमहापौरपदाची निवड बिनविरोध होत असल्याने ही घटना विशेष ठरली आहे. या घडामोडीमुळे महायुतीच्या संघटनात्मक ताकदीची राजकीय वर्तुळात जोरदार चर्चा सुरू झाली आहे. आज उमेदवारी अर्ज भरण्याचा अंतिम दिवस असून दोन्ही उमेदवारांनी आपले अर्ज दाखल केले आहेत.
जळगाव महानगरपालिकेच्या ७५ पैकी तब्बल ७० जागांवर भाजप, शिवसेना आणि राष्ट्रवादी काँग्रेस (महायुती) यांचे नगरसेवक निवडून आले आहेत. या प्रचंड बहुमतामुळे विरोधकांची भूमिका केवळ औपचारिक ठरली आहे. याच संख्याबळाच्या जोरावर पालकमंत्री गुलाबराव पाटील आणि गिरीश महाजन यांनी महापौर-उपमहापौर निवडीचा पेच अत्यंत कौशल्याने सोडवला. ही निवड आगामी १० महिन्यांच्या कालावधीसाठी असणार आहे.
बैठकीनंतर, पालकमंत्री गुलाबराव पाटील आणि गिरीश महाजन यांच्या उपस्थितीत उमेदवारांनी महानगरपालिकेत आपले अर्ज दाखल केले. विरोधात कोणताही अर्ज दाखल न झाल्याने निवड बिनविरोध होणे जवळपास निश्चित झाले असून, येत्या ६ तारखेला अधिकृत घोषणा करण्यात येणार आहे.
बैठकीत मार्गदर्शन करताना पालकमंत्री गुलाबराव पाटील म्हणाले की, महायुतीचे महापौर व उपमहापौरपदाचे उमेदवार निश्चित झाले असून, आता सर्व नगरसेवकांनी मतभेद विसरून शहराच्या विकासासाठी एकत्र काम करावे.
नगरसेवकांना संबोधित करताना गिरीश महाजन म्हणाले, “राज्यात पहिल्यांदाच जळगावात अशा प्रकारची बिनविरोध निवड होत आहे, ही अभिमानाची बाब आहे. निवडून आलेल्या प्रत्येक नगरसेवकाचा सन्मान राखला जाईल. महापौर व उपमहापौरपदासह स्थायी समिती, विषय समित्या आणि इतर महत्त्वाच्या पदांवर सर्वांना समान संधी दिली जाईल.”या आश्वासनामुळे नगरसेवकांमध्ये उत्साहाचे वातावरण निर्माण झाले.
महायुतीकडे ७० जागांचे निर्विवाद वर्चस्व असल्याने मनपातील सत्तेची सर्व सूत्रे आता त्यांच्या हाती आली आहेत. शहराचा विकास, प्रलंबित प्रश्नांचे निराकरण आणि महायुतीची पकड अधिक मजबूत करणे, हे नवनिर्वाचित महापौर व उपमहापौरांसमोरचे प्रमुख आव्हान असणार आहे.
नावांची घोषणा होताच कार्यकर्त्यांनी गुलाल उधळून जल्लोष केला. “जळगावच्या सर्वांगीण विकासासाठी महायुतीचे सर्व नगरसेवक एकदिलाने काम करतील,” असा विश्वास यावेळी व्यक्त करण्यात आला.
