संगमनेर: पाकिस्तानमध्ये तयार होणारी मानवी आरोग्यास घातक मानली जाणारी ‘गोरी ब्यूटी क्रीम' आणि ‘गोरी डे अँड नाईट क्रीम’ची संगमनेरच्या बाजारात विक्री करणाऱ्या दोन दुकानांवर अन्न व औषध प्रशासनाने छापे टाकून १२ हजार ९०० रुपयांचा पाकिस्तानात उत्पादित झालेला सौंदर्यप्रसाधनांचा साठा जप्त केला.
दुकानदाराला चौकशीसाठी ताब्यात घेतले आहे.पाकिस्तानात तयार होणाऱ्या गोरी ब्यूटी क्रीम आणि गोरी डे अँड नाईट क्रीमची संगमनेरमध्ये विक्री केली जात होती. याची माहिती अन्न व औषध प्रशासनाला मिळाली होती.प्रशासनाच्या पथकाने संगमनेर शहर पोलिसांच्या मदतीने शनिवारी (दि. १) दुपारी गोल्डन मार्केटमधील दुकानावर छापा टाकत १२ हजार ९०० रुपयांचा पाकिस्तानी सौंदर्यप्रसाधनांचा साठा जप्त केला.
याप्रकरणी संबंधित दुकानदाराला चौकशीसाठी ताब्यात घेतले असून त्याच्याविरुद्ध संगमनेर शहर पोलिस ठाण्यात गुन्हा दाखल केला आहे.याबाबत अन्न व औषध निरीक्षक सोमनाथ मुळे (अहिल्यानगर) यांच्या फिर्यादीनुसार शाहीद रियाज शेख (वय ३६, रा. शिकलकर लेन, मोगलपुरा, पुणे रोड व दुसरे दुकान रहेमतनगर जोर्वे रोड) संगमनेर याच्या दोन्ही दुकानांवर छापे टाकण्यात आले.
तपासणीदरम्यान पाकिस्तान इन पाकिस्तान स्टँडर्ड, असा उल्लेख असलेल्या गोरी ब्यूटी क्रीम व गोरी डे अँड नाईट क्रीमचा साठा आढळून आला. यामध्ये विविध किमतीचे बॉक्स जप्त करण्यात आले. या सौंदर्यप्रसाधनातील काही घटक त्वचा, किडनी तसेच मानवी आरोग्यास गंभीर धोका निर्माण करू शकतात, अशी माहिती समोर आली आहे.
भारत देशात विक्रीसाठी परवानगी नसताना ही उत्पादने संगमनेरपर्यंत कोणत्या मार्गाने पोहोचली, याचा तपास सुरू आहे. पोलिस निरीक्षक समीर बारवकर, उपनिरीक्षक श्रीकांत सावंत, विजय खुळे, बाबासाहेब सातपुते, विजय आगलावे, सागर नागरे यांच्या पथकाने औषध प्रशासनाच्या सहकार्याने ही कारवाई केली.
