पाथर्डी: रविवारची सुट्टी आणि शारदीय नवरात्रोत्सवातील आठव्या माळेचा योग साधत श्री क्षेत्र मोहटादेवी गडावर लाखो भाविकांनी दर्शनासाठी गर्दी केली. शनिवार आणि रविवार या सलग दोन दिवसांत भाविकांचा अलोट जनसागर उसळल्याने गडाकडे येणारे सर्व रस्ते गर्दीने फुलून गेले होते. वाहनांसह पायी येणाऱ्या भाविकांची संख्या लक्षणीय होती. ‘जगदंबा देवी माता की जय’, ‘मोहटादेवी माता की जय’ अशा जयघोषाने संपूर्ण गड परिसर दुमदुमून गेला.
शनिवारी पहाटेपासूनच भाविकांचा ओघ सुरू झाला होता. रात्री गर्दीचा उच्चांक गाठल्याने दोन तासांहून अधिक काळ वाहतूक विस्कळीत झाली. रविवारीही गर्दी कायम राहिल्याने पोलीस प्रशासनाने खबरदारी म्हणून वाहनांना दूरवरच रोखून टप्प्याटप्प्याने पार्किंगच्या ठिकाणी पाठविले. पाथर्डी-बीड राज्य मार्गासह तारकेश्वर गड रस्ता, मोहरी-भांडेवाडी रस्ता आणि मोहटे गावाकडील मार्गांवरही मोठी गर्दी झाली होती.
गर्दीचे नियोजन करण्यासाठी देवस्थान समितीने व्हीआयपी रस्ता बंद केला. त्यामुळे स्थानिक पोलीस, सुरक्षारक्षक आणि स्वयंसेवकांना ये-जा करताना कसरत करावी लागली. मात्र, या निर्णयामुळे दर्शनाच्या रांगेत न थांबता दर्शन घेण्याच्या प्रकारांना आळा बसला. उपविभागीय पोलीस अधिकारी नीरज राजगुरू आणि पोलीस निरीक्षक नितीन खंडारे हे शनिवारी रात्रीपासून पोलीस पथकासह रस्त्यावर उतरून वाहतूक सुरळीत करण्यासाठी प्रयत्नशील होते. नवरात्रोत्सवात मोहटादेवीचे दररोज साकारले जाणारे आगळेवेगळे रूप, गाभाऱ्यातील आकर्षक फुलांची सजावट तसेच विविध फळे आणि प्रसादाची सजावट भाविकांचे लक्ष वेधून घेत होती.
देवीचे मनोभावे दर्शन घेण्यासाठी भाविक सर्व अडथळे पार करून गडावर पोहोचत होते. मंदिर व परिसर स्वच्छ ठेवण्यासाठी देवस्थान ट्रस्टचे कर्मचारी आणि स्वयंसेवक अहोरात्र परिश्रम घेत होते.भाविकांच्या सुरक्षेसाठी पोलीस, खासगी सुरक्षारक्षक, देवस्थानचे सुरक्षा कर्मचारी, स्वयंसेवक आणि सीसीटीव्ही कॅमेऱ्यांच्या माध्यमातून लक्ष ठेवण्यात आले होते. दर्शनरांगेत खेळती हवा, पिण्याचे पाणी आणि स्वच्छतागृहांची व्यवस्था करण्यात आली होती. महिला, पुरुष, वृद्ध आणि लहान मुलांनी दर्शनासाठी गर्दी केली होती. विशेषतः महिला भाविकांची संख्या मोठी होती.
सातव्या आणि आठव्या माळेनिमित्त विविध सामाजिक संघटनांच्या कार्यकर्त्यांनी स्वयंस्फूर्तीने स्वयंसेवक म्हणून जबाबदारी पार पाडत देवस्थान ट्रस्ट व प्रशासनाला मदत केली. गडाच्या पायथ्याशी असलेली हार-फुले, पेढे व प्रसादाची दुकाने, खेळण्यांची दुकाने तसेच हॉटेल व्यवसायिकांच्या दुकानांमध्येही भाविकांची खरेदीसाठी गर्दी झाली होती. पोलिसांनी रविवारी गडावर वाहनांना जाण्यास बंदी घालून ठिकठिकाणी पार्किंगची व्यवस्था केली. त्यामुळे गडावरील वाहतूक कोंडी टळून भाविकांना दिलासा मिळाला.
