पाथर्डी: मिरी (ता. पाथर्डी) येथे घडलेल्या थरारक खूनप्रकरणाचा अखेर उलगडा झाला आहे. दोन गुंठे जागेच्या विक्रीतून मिळालेल्या पैशाच्या वाटपावरून निर्माण झालेल्या वैरामुळे नातवानेच आपल्या 75 वर्षीय आजीचा खून करून तिचा मृतदेह घरातच जाळल्याचे धक्कादायक वास्तव तपासात उघड झाले आहे. पाथर्डी पोलिसांनी या गुन्ह्यातील आरोपी सचिन सुरेश मैंदड (वय 30, रा. माळवाडी, वडगाव गुप्ता, जि. अहिल्यानगर) यास अटक केली असून, न्यायालयाने त्याला 13 ऑक्टोबरपर्यंत पोलिस कोठडी दिली आहे. (Latest Ahilyanagar News)
दिनांक 6 ते 8 मे 2025 दरम्यान सकाळी 10.45 वाजेपर्यंत, मिरी गावात किसनबाई छगन मैंदड (वय 75) या महिलेचा खून करून तिचा मृतदेह घरातच जाळल्याचे उघडकीस आले होते. किसनबाईंची मुलगी छाया हरिश्चंद्र खोसे (रा. निंबेनांदूर) हिने पाथर्डी पोलिसात फिर्याद दिली होती. पोलिस तपासात हा गुन्हा मयत किसनबाई यांचा नातू सचिन सुरेश मैंदड यानेच केल्याचे निष्पन्न झाले.
किसनबाईंनी त्यांच्या नावावर असलेली दोन गुंठे जागा 12 लाख रुपयांना विकली होती. त्या रकमेतून दोन्ही नातवांना सचिन आणि चैतन्य मैंदड यांना प्रत्येकी 5 लाख रुपये देण्यात आले होते. मात्र, उर्वरित 1 लाख 80 हजार रुपये त्यांनी मिरी येथील एका बँकेत फिक्स डिपॉझिट केले होते. त्याचा वारस चैतन्य सुरेश मैंदड असे नमूद केले होते. याच कारणावरून आरोपी सचिनच्या मनात राग होता. त्यातूनच तो सतत आजीशी भांडत होता.
संक्रांतीच्या काळातसुद्धा त्याने आजीला मारहाण केली होती. 6 मे रोजी आरोपीने रागाच्या भरात आजीचा खून करून पुरावे नष्ट करण्यासाठी तिचे प्रेत जाळून टाकले. या प्रकरणात आरोपी सचिन सुरेश मैंदड यास 8 ऑक्टोबर रोजी अटक करण्यात आली. पोलिस निरीक्षक विलास पुजारी तपास करीत आहेत.
