नगर: जिल्हा परिषदेच्या आरोग्य विभागाकडून जेईएम पोर्टलवर औषधे खरेदीची प्रक्रिया राबविण्यात येत आहे. या खरेदीत १९९ प्रकारच्या औषधांचा समावेश आहे. सुमारे कोट्यावधी रुपयांच्या या खरेदीत पॅरासिटामॉलच्या ५० लाख गोळ्यांसह विविध औषधांच्या समावेश आहे. दरम्यान, गोळ्या, इंजेक्शन, सिरप व मलम, बँडेज, ऑपरेशन साहित्य, इतर औषधांचा या खरेदीत समावेश आहे.
दि. २४ सप्टेंबर रोजी जेईएम पोर्टलवर प्रसिद्ध निविदेतील तपशिलानुसार, पॅरासिटामॉल ५० लाख गोळ्या, सेटिरीझिन ३५ लाख गोळ्या आणि क्लोरफेनिरामाइन मॅलिएटच्या ४० लाख गोळ्यांचा समावेश आहे. फ्युराझोलिडोनच्या १०० मिलिग्रॅमच्या ३० लाख गोळ्यांची मागणी आहे. याशिवाय ट्रामाडोल ५० मिलिग्रॅमच्या तीन लाख गोळ्या, रॅनिटिडिन १५० मिलिग्रॅमच्या पाच लाख गोळ्या, तर लॉराझेपाम दोन मिलिग्रॅमच्या ५० हजार गोळ्यांचा समावेश आहे.
फेनोबार्बिटोन सोडियम ३० मिलिग्रॅमच्या १५ हजार आणि फेनिटॉइन सोडियम १०० मिलिग्रॅमच्या २५ हजार गोळ्यांचीही मागणी आहे. त्वचारोगावरील क्लोबेटासोल मलमाच्या १५ हजार ट्यूब, तसेच मधुमेह, उच्च रक्तदाब, संसर्ग आणि इतर आजारांवरील औषधांचाही या खरेदीत समावेश आहे. सर्पदंश आणि रेबीजविरोधी औषधांचाही निविदेत समावेश असल्याचे दिसते. या औषध खरेदीमुळे प्राथमिक आरोग्य केंद्र, उपकेंद्रातील रुग्णांना लाभ होणार आहे.
लेखापरीक्षण अहवालाची तपासणी व्हावी!
मागील पाच वर्षांत कोणत्या कंपन्यांना पुरवठ्याची संधी मिळाली, एकाच कंपनीला वारंवार मोठ्या प्रमाणावर काम मिळाले आहे का, औषधांचे दर मागील वर्षांच्या तुलनेत वाढले की कमी झाले, निविदेत सहभागी झालेल्या कंपन्यांची संख्या किती होती आणि पात्र कंपन्यांमध्ये किती स्पर्धा झाली, पॅरासिटामॉलसारख्या मोठ्या प्रमाणावर मागणी असलेल्या औषधांचे प्रमाण कोणत्या निकषांवर निश्चित करण्यात आले,
मागील खरेदीतील शिल्लक साठ्याचा विचार करूनच नवीन मागणी नोंदविण्यात आली का, औषधांची गुणवत्ता तपासणी, मुदत आणि प्रत्यक्ष वितरणावर कोणाचे नियंत्रण आहे, तसेच खरेदी प्रक्रियेचे लेखापरीक्षण करून काही आक्षेप नोंदविण्यात आले आहेत का, इत्यादी प्रश्नांची उत्तरे मिळविण्यासाठी मागील पाच वर्षांचे निविदा दस्तऐवज, पुरवठादारांची नावे, औषधनिहाय दर, खरेदी आदेश आणि लेखापरीक्षण अहवाल तपासणी करावी, अशी मागणी छत्रपती प्रतिष्ठानकडून करण्यात येत आहे.
