नगर: शेंडी बायपास रस्त्यावर आलिशान कारमधून गावठी पिस्तूल विक्रीसाठी आलेल्या दोन अट्टल गुन्हेगारांना स्थानिक गुन्हे शाखेच्या पथकाने अत्यंत शिताफीने सापळा रचून अटक केली. त्यांच्या ताब्यातून पाच गावठी पिस्तुले, आलिशान कार व मोबाईल असा एकूण १० लाख ९० हजार रुपयांचा मुद्देमाल हस्तगत केला. अटक केलेल्या आरोपीवर खुनासारखे गंभीर गुन्हे दाखल आहेत.
पिंटू उर्फ भाऊ आनंदा रसाळ (वय ४०, रा. रसाळवाडी, निघोज, ता. पारनेर, जि. अहिल्यानगर), बंटी उर्फ स्वप्निल बिभीषण पाबळे (वय ३०, रा. कावळ पिंपरी, ता. जुन्नर, जि. पुणे) असे अटक केलेल्या दोघांची नावे आहेत. स्थानिक गुन्हे शाखेचे पोलिस निरीक्षक संतोष मुटकुळे यांनी उपनिरीक्षक अनंत सालगुडे, कृष्णकुमार सेदवड यांच्या पथकाने एमआयडीसी पोलिस ठाण्याच्या हद्दीत तपास सुरू केला.
१९ जुलै रोजी पोलिसांना गोपनीय माहिती मिळाली की, भाऊ आनंदा रसाळ आणि बंटी उर्फ स्वप्निल पाबळे हे दोघे गावठी पिस्तुल घेऊन विक्रीसाठी एमआयडीसी डेअरी चौक ते शेंडी बायपास रस्त्यावर ग्राहक शोधत थांबले आहेत.
त्यानुसार पथकाने छापा घालून कार पकडली आणि वरील दोघांना ताब्यात घेतले. कारची झडती घेतली असता पाच गावठी पिस्तुल, अलिशान कार, दोन मोबाईल असा १० लाख ९० हजारांचा मुद्देमाल जप्त केला. याप्रकरणी एमआयडीसी पोलिस ठाण्यात गुन्हा दाखल केला आहे.
धाराशिवमधून आणले गावठी पिस्तुल
पकडण्यात आलेल्या शस्त्रांबाबत विचारपूस केली असता, आरोपी भाऊ रसाळ याने सांगितले की, हे गावठी पिस्तुल भैय्या उर्फ ऋषिकेश सुभाष भोसले (रा. जि. धाराशिव) याच्याकडून विकण्यासाठी आणले होते. मुख्य पुरवठादार भैय्या भोसले हा सध्या फरार असून पोलिस त्याचा कसून शोध घेत आहेत.
