नगर: जिल्ह्यात घरगुती गॅस सिलिंडरची कृत्रिम टंचाई करणाऱ्यांवर कडक कारवाई करण्यासाठी जिल्हा प्रशासनाने पथके नियुक्त केली आहेत. मात्र, दुसरीकडे शहर आणि जिल्ह्यात व्यावसायिक गॅस सिलिंडरची कृत्रिम टंचाई निर्माण झाली आहे.
त्यामुळे हॉटेल व्यावसायिकांना सिलिंडर घेण्यासाठी 3 हजार रुपये मोजावे लागत आहे. परिणामी हॉटेलमधील पदार्थांचे दर वाढले आहेत. घरगुती गॅस सिलिंडरचा अवैध विक्री वा वापर रोखण्यासाठी चार तपासणी पथके नियुक्त केली आहेत.एका पथकाकडे चार तालुके असणार आहेत. ही पथके गॅस एजन्सीची तपासणी करणार आहेत.
दरम्यान, जिल्हाभरात व्यावसायिक गॅस सिलिंडरचा तुटवडा भासू लागला आहे. काही ठिकाणी एजन्सीकडून कृत्रिम टंचाई निर्माण केली जात आहे. अहिल्यानगर शहरात व्यावसायिक सिलिंडर चढ्या भावाने विकली जात आहेत.
तारकपूर परिसिरातील एका हॉटेल व्यावसायिकाला तीन हजार रुपयाला सिलिंडर विकत घ्यावे लागले. त्यामुळे आगामी काही दिवसांत हॉटेलचे दर वाढलेले दिसणार आहेत. याचा फटका सर्वसामान्य जनतेला बसणार आहे.
केवळ आठ हजारांचा साठा
जिल्ह्यात चार दिवस पुरेल इतका आठ हजार इतका व्यावसायिक सिलिंडरचा साठा आहे. दररोज 2 हजारांपेक्षा अधिक सिलिंडरची आवश्यकता आहे. सध्या नवीन साठा उपलब्ध झालेला नाही. शिल्लक साठ्यातूनच सिलिंडर वितरित केले जात असल्याचे एका एजन्सीधारकाने सांगितले आहे.
