Sunetra Pawar on Rupali Chakankar resignation
मुंबई: अजित पवार गटाच्या नेत्या आणि राज्य महिला आयोगाच्या अध्यक्षा रूपाली चाकणकर यांनी शुक्रवारी आपल्या पदाचा राजीनामा दिला. उपमुख्यमंत्री सुनेत्रा पवार यांच्या 'देवगिरी' बंगल्यावर भेट घेतल्यानंतर आणि त्यांच्यासोबतच्या चर्चेनंतर चाकणकरांनी आपल्या पदाचा राजीनामा दिला. सुनेत्रा पवार यांच्याकडे त्यांनी महिला आयोगाच्या अध्यक्षपदाबरोबरच राष्ट्रवादी (अजित पवार) महिला प्रदेशाध्यक्षपदाचाही राजीनामा दिला. यानंतर आज सुनेत्रा पवार यांनी याबाबत 'एक्स' पोस्ट केली आहे.
महिलांवरील बलात्काराच्या आरोपाखाली अटक करण्यात आलेला स्वयंघोषित ज्योतिषी भोंदूबाबा अशोक खरात याला पाठीशी घालणाऱ्या राज्य महिला आयोगाच्या अध्यक्षा रूपाली चाकणकर यांना या पदाचा तातडीने राजीनामा द्या, असे आदेश मुख्यमंत्री देवेंद्र फडणवीस यांनी शुक्रवारी दिले होते.
सायंकाळी ७ वाजण्याच्या दरम्यान त्यांनी मुख्यमंत्री फडणवीस यांची भेट घेतली होती. माझा खरात याच्या ट्रस्टबाबत संबंध आहे. मात्र, त्याच्या कारनाम्याबाबत मला माहिती नाही, असे स्पष्टीकरण देत आपली बाजू मांडण्याचा त्यांनी प्रयत्न केला. मात्र, मुख्यमंत्र्यांनी रूपाली चाकणकर यांची बाजू फेटाळून लावली. त्यांना तत्काळ राज्य महिला आयोगाच्या अध्यक्षपदाचा राजीनामा द्या, असे स्पष्ट आदेश दिले.
आज सुनेत्रा पवार यांनी एक्सवरील पोस्टमध्ये लिहीले आहे की, "महाराष्ट्र राज्य महिला आयोगाच्या अध्यक्षा रुपाली चाकणकर यांचा राजीनामा मला प्राप्त झाला आहे. सद्य परिस्थिती आणि सुरू असलेल्या चौकशीच्या पार्श्वभूमीवर त्यांनी पदाचा त्याग करण्याचा निर्णय घेतला आहे. ही चौकशी निष्पक्ष आणि पारदर्शक होण्याच्या दृष्टीकोनातून मी त्यांचा राजीनामा पुढील कार्यवाहीसाठी मुख्यमंत्र्यांकडे पाठवत आहे."
