मुंबई: सार्वजनिक ठिकाणी थुंकणाऱ्या प्रवृत्तीला ‘राष्ट्रीय छंद' असल्याचे म्हणत, हायकोर्टाने तीव्र नाराजी व्यक्त करत दोन हजार रुपये दंड वसूल करा, असे आदेश महापालिका प्रशासनाला दिले होते. मात्र अद्यापपर्यंत याची कोणतीही अंमलबजावणी न झाल्यामुळे शहरातील सार्वजनिक ठिकाणी थुंकणे सुरूच आहे.
शहरातील सार्वजनिक ठिकाणांसह रस्त्यांवर अथवा पदपथांवर कचरा टाकणे, थुंकणे व संपूर्ण परिसर अस्वच्छ करणाऱ्यांना आळा घालण्यासाठी महापालिकेमध्ये क्लीन-अप मार्शल योजना सुरू होती. मात्र पालिकेने अन्य पर्यायी व्यवस्था उभी न करता ही योजना बंद केली.
त्यामुळे मुंबई अस्वच्छ करणाऱ्या नागरिकांची संख्या पुन्हा मोठ्या प्रमाणात वाढली. विशेषत: थुंकणाऱ्या नागरिकांचे प्रमाण मोठे असून याबाबत हायकोर्टाने तीव्र नाराजी व्यक्त केली होती. एवढेच नाही तर अशा प्रवृत्तीच्या नागरिकांना आळा घालण्यासाठी दंडाची रक्कम दोन हजार रुपये करा असे निर्देशही दिले होते. परंतु हायकोर्टाच्या या निर्देशाकडे महापालिकेकडून दुर्लक्ष करण्यात आले असून शहरात थुंकणे सुरूच आहे.
तातडीने दंड वाढवणे शक्य नाही
सध्या थुंकणाऱ्यांकडून २५० रुपये दंड आकारला जातो. यात वाढ करायची असेल तर तसा प्रस्ताव महापालिका सभागृहात मंजूर होणे आवश्यक आहे. एवढेच नाही तर राज्याच्या नगर विकास विभागाचीही याला मंजुरी लागणार आहे. त्यामुळे प्रशासनाला तातडीने दंड वाढवणे शक्य नाही. मात्र येणाऱ्या काळात हायकोर्टाच्या निर्देशानुसार दंड वाढवला जाईल, असे पालिकेच्या घनकचरा विभागाकडून स्पष्ट करण्यात आले.
सध्याचा दंड
सार्वजनिक ठिकाणी कचरा टाकणे - ५०० रुपये
थुंकणे - २५० रुपय
सार्वजनिक ठिकाणी आंघोळ - ३०० रुपये
लघवी करणे - ५०० रुपये
शौच करणे - ५०० रुपये
प्राणी, पक्ष्यांना खाद्य देणे - ५०० रुपये
भांडी, कपडे धुणे - ५०० रुपये
वाहने धुणे - ३०० रुपये
