मुंबई : 16 वर्षांच्या मुलीचा पाठलाग करुन तिला फ्लाईंग किस देणाऱ्या विकृताला मुंबई सत्र न्यायालयातील विशेष न्यायालयाने दोषी ठरवत तीन वर्षांच्या तुरुंगवासाची शिक्षा सुनावली.
फ्लाइंग किस देण्याची कृती लैंगिक हावभाव आहे. त्यामुळे पीडित मुलीचा लैंगिक छळ होतो. ते कृत्य पीडित मुलीच्या वा महिलेच्या प्रतिष्ठेचे उल्लंघन करते, असे निरीक्षण न्यायालयाने नोंदवले. याचवेळी आरोपीला 3 हजार रुपयांचा दंडही ठोठावण्यात आला. नऊ वर्षांपूर्वी ही घटना घडली होती.
31 जानेवारी 2017 रोजी हळदी कुंकू कार्यक्रमादरम्यान आरोपीने अल्पवयीन मुलीला पाहिले आणि तिच्याकडे पाहून तिला फ्लाईंग किस दिला. हे कृत्य पाहिलेल्या शेजाऱ्याने पीडितेच्या आईला आरोपीच्या आक्षेपार्ह हावभावाची माहिती दिली. त्यानंतर मुलीने तिच्याबाबतीत यापूर्वीदेखील अशीच घटना घडली असल्याचे सांगितले.
मुलगी ट्यूशनला जात असताना आरोपी तिच्या मागून आला होता आणि त्याने तिचा हात धरुन स्वतःकडे खेचले होते. घाबरलेल्या मुलीने सुरुवातीला तिच्या पालकांना हा प्रकार सांगितला नव्हता. मुलीला दिलेला फ्लाईंग किस तसेच तिचा पाठलाग आणि लैंगिक छळ केल्याप्रकरणी न्यायालयाने आरोपीला दोषी ठरवले. याच आरोपाखाली आरोपीला तीन वर्षांचा तुरुंगवास आणि 3 हजार रुपयांचा दंड ठोठावला.
आरोपी विवाहित असून त्याला तीन महिन्यांचे बाळ आहे. खटल्यादरम्यान बचाव पक्षातर्फे वकील संतोष पगारे यांनी पीडित मुलीची उलटतपासणी केली. आधीच्या दुश्मनीतून खोटा आरोप लावण्यात आल्याचा बचावात्मक युक्तिवाद करण्यात आला होता. तथापि, न्यायालयाने हा युक्तिवाद अमान्य करीत आरोपीला शिक्षा सुनावली.
