Rare Surgery Child Lung :
मुंबई : मुंबईच्या जसलोक हॉस्पिटलमधील डॉक्टरांनी एका अत्यंत दुर्मिळ आणि गुंतागुंतीच्या मेडिकल केसमध्ये अविश्वसनीय कामगिरी केली आहे. त्यांनी एका साडेतीन वर्षांच्या मुलाच्या फुफ्फुसात अडकलेला एलईडी बल्ब यशस्वीरित्या बाहेर काढला. डॉ. विमेश राजपूत आणि डॉ. दिव्य प्रभात यांनी केलेल्या यशस्वी उपचारामुळे मुलाला जीवदान मिळाले आहे, अशा शब्दांमध्ये मुलाच्या वडिलांनी कृतज्ञता व्यक्त केली.
राहुल (नाव बदलले आहे) हा साडेतीन वर्षांचा मुलगा खेळण्यातील बससोबत खेळत होता. खेळता खेळता बस तुटली आणि बसमधील एलईडी बल्ब बाहेर आला. राहुलने खेळता खेळता तो बल्ब गिळला. ही घटना साधारण तीन महिन्यांपूर्वीची.
आपल्या मुलाने याची माहिती पालकांना मिळाली नाही. काही दिवसांनी मुलाला सतत खोकला येऊ लागला, तसेच त्याला श्वास घेतानाही त्रास सुरू झाला. त्याच्यावर अनेक उपचार करण्यात आले, मात्र लक्षणे कायम राहिली. यानंतर डॉक्टरांनी सीटी स्कॅन करण्याचा निर्णय घेतला. मुलाच्या डाव्या ब्रोन्कसमध्ये खोलवर धातूचा भाग असल्याचे आढळले. कोल्हापूरात फ्लेक्सिबल ब्रॉन्कोस्कोपीच्या उपचारानंतर मुलाला अधिक उपचारासाठी मुंबईत जसलोक हॉस्पिटल अँड रिसर्च सेंटरमध्ये दाखल करण्यात आले. 19 ऑगस्ट रोजी हॉस्पिटलमध्ये ऍडमिट करण्यात आले. 22 ऑगस्ट रोजी त्याचं ऑपरेशन करण्यात आले आणि 26 ऑगस्ट रोजी त्याला डिस्चार्ज देण्यात आला असून त्याची प्रकृती आता स्थिर आहे.
ब्रॉन्कोस्कोपीमध्ये गिळलेला एलईडी बल्ब ब्रोन्कसमध्ये आढळून आला. त्यानंतर डॉ. विमेश राजपूत आणि डॉ. दिव्य प्रभात यांनी मिनी थोरॅकोटॉमी (४ सेमी कट) केली. या प्रक्रियेत खेळण्यांच्या गाडीतून गिळलेला एलईडी बल्ब यशस्वीरित्या काढून टाकण्यात आला आणि मुलाच्या फुफ्फुसांचे कार्य पूर्ववत करण्यात आले. अॅनेस्थेसियोलॉजी सल्लागार डॉ. अनुराग जैन यांनी या शस्त्रक्रियेत सहकार्य केले.
उपचाराबाबत माहिती देताना जसलोक हॉस्पिटलमधील थोरॅसिक सर्जन डॉ. विमेश राजपूत म्हणाले, “आजवर आम्ही ऑपरेट केलेली ही सर्वात दुर्मिळ केस होती. एलईडी बल्ब फुफ्फुसामध्ये खोलवर गेला होता. समकालीन उपचार पद्धती बल्ब बाहेर काढण्यात अयशस्वी ठरल्या. मात्र काळजीपूर्वक नियोजन केलेल्या मिनी थोरॅकोटॉमीद्वारे आम्ही सुरक्षितपणे एलईडी बल्ब बाहेर काढला आणि मुलाला जीवनदान मिळाले.”
ईएनटी सर्जन डॉ. दिव्य प्रभात म्हणाल्या, “मुलांमध्ये अस्पष्ट आणि सतत दिसणाऱ्या श्वसनसंबंधित लक्षणांकडे कधीही दुर्लक्ष करू नये. अनेकदा न्यूमोनिया किंवा इतर सामान्य आजारांमुळे अशा केसचे निदान होण्यास विलंब होतो. प्रगत इमेजिंगद्वारे लवकर निदान केल्यास परिणामांमध्ये लक्षणीय सुधारणा होऊ शकते आणि गुंतागुंत टाळता येऊ शकते.”
जागरूकतेच्या महत्त्वावर भर देत जसलोक हॉस्पिटलचे चीफ मेडिकल ऑफिसर डॉ. मिलिंद खडके म्हणाले, “मुलांनी एखादी वस्तू गिळणे हे पालकांच्या लक्षात न येणे स्वाभाविक आहे. वेळेवर वैद्यकीय लक्ष आणि तज्ज्ञांचा हस्तक्षेप फुफ्फुसाचे दीर्घकालीन नुकसान होण्यास प्रतिबंध करण्यासाठी महत्त्वाचे आहे. ही केस पालकांना आणि आरोग्यसेवा प्रदात्यांना मुलांमध्ये गंभीर, अनिश्चित श्वसनसंबंधित समस्या आढळल्यास दक्ष राहण्याची आठवण करून देते.”
डॉक्टरांचे आभार व्यक्त करताना मुलाचे वडील अविनाश पाटील म्हणाले, “योग्य उपचारामुळे आम्हाला मिळालेला दिलासा शब्दात सांगता येणार नाही. तीन महिने आम्ही सतत भीतीच्या वातावरणात जगत होतो. आमच्या मुलाला काय झाले आहे हे आम्हाला कळत नव्हते. जसलोक हॉस्पिटलमधील अविश्वसनीय टीमचे आभार, माझा मुलगा आता मोकळा श्वास घेईल. हॉस्पिटलने आमच्या मुलाला नवजीवन दिले आहे. आम्ही नेहमी त्यांचे आभारी राहू.”
