मुंबई : गोवंडी येथे राहणाऱ्या शिफा शेख या 19 वर्षीय तरुणीची मंगळवारी भरदिवसा गोळी झाडून हत्या करण्यात आली. या हत्येप्रकरणी तिचा प्रियकर नदीम व तबस्सूम या महिलेला अटक करण्यात आली आहे. चौकशीत तिहेरी प्रेमसंबंधातून ही हत्या झाल्याचे उघडकीस आले आहे.
ही घटना मंगळवारी दुपारी बारा वाजता गोवंडीतील शिवाजीनगर, कमला रमण नगर परिसरात घडली. याच परिसरात शिफा ही तिच्या कुटुंबीयांसोबत राहात असून तिचे वडील बांधकाम कंत्राटदार आहेत. शिफाचे नदीमशी, तर नदीमचे तबस्सूम नावाच्या एका महिलेशी प्रेमसंबंध होते. या तिहेरी प्रेमसंंबंधांतून त्यांच्यात काही दिवसांपासून वाद सुरू होता. याच वादातून मंगळवारी दुपारी बारा वाजता शिफावर अज्ञात व्यक्तीने गोळीबार केला होता. त्यात तिच्या मानेला आणि गळ्याला गंभीर दुखापत झाली होती.
रक्तबंबाळ झालेल्या शिफाला तातडीने जवळच्या शासकीय रुग्णालयात दाखल करण्यात आले होते. तिथे तिला डॉक्टरांनी मृत घोषित केले. शिफाचा मृतदेह नंतर राजावाडी रुग्णालयात शवविच्छेदनासाठी पाठविण्यात आला होता.
गोळीबाराची माहिती मिळताच परिमंडळ 6 चे पोलीस उपायुक्त समीर शेख यांनीही घटनास्थळी भेट देऊन तपासाला वेग दिला. शिफाच्या कुटुंबीयांच्या जबानीवरून पोलिसांनी अज्ञात व्यक्तीविरुद्ध हत्येचा गुन्हा दाखल केला आहे. पोलिसांनी हत्येप्रकरणी तिचा प्रियकर नदीम यास चौकशीसाठी ताब्यात घेतले.
चौकशीत शिफावर तबस्सूमने गोळी झाडल्याची माहीती समोर आली. ती मात्र गोळीबारानंतर ती पळून गेली होती. तिच्या अटकेसाठी पोलिसांनी विशेष मोहीम हाती घेतली होती. पळून गेलेल्या तबस्सूमलाही अटक करण्यात आली आहे. तिचा मोबाईल पोलिसांनी ताब्यात घेतला असून या मोबाईलची तपासणी सुरू आहे. या दोघांच्या अटकेनंतर तिहेरी प्रेमसंबंधातून त्यांच्यात वाद होते. यातूनच गोळी झाडून या तरुणची हत्या करण्यात आल्याचे उघड झाले आहे.
गोळीबारासाठी वापरलेले पिस्तूल कुठून आले याचाही तपास पोलिसांकडून केला जात आहे. या प्रकरणात शस्त्र पुरवठ्यामागे इतर कोणाचा सहभाग आहे का, याचाही शोध घेतला जात आहे.
या गोळीबारामुळेे बैंगणवाडी परिसरात भीतीचे वातावरण निर्माण झाले होते. पोलिसांनी पळून गेलेल्या आरोपी महिलेलाही अटक केली आहे.
